Advertisement ad1

Jowai: Kam ka dak i kynmo warom iaka 2 tarik ka lyngkhooh sngikha u Mahatma Gandhi kamjooh leh iaka sngi “Green Day Campaign” ka dong Loompyrdi Iongpiah da lum da khut ko ia ki dkhot iong ka cha kani ka pynche paidbah deiwa emlang ki bru chemphang kiwa e jingmut ia ki paidbah ia kiwa emkam ki u leh wa u snaiwthooh iow man ka imlang ka sahlang kawa chait wa khiah nadooh i rukom noh ia ki jhep, u iada ia ki tyllong um wa kamjooh leh u pynduna ia i pynjot ia ka beirymaw.

Ha kani ka sngi i pynche paidbah hei iatoh wa kammon u pynman iaka chnong kawa khooid wa suba iow lait na i kjut i chitom wa boonjait, ha Iungwalieh ka dong Lumpyrdi Iongpiah da wan u pynche paidbah le ngut ki bru chemphang kitæ toh u SDO PHE Amlarem u Deibormi Toi, u Somiki Najiar SDO Pathor Khmah wa u Samdakiyo Shullai Range Forest Officer Amlarem heiwa u ma SC Laloo Additional DC da man u kam u kongsan.

Advertisement ad1

U Deibormi Toi  da batai u hei iatoh waka ‘Water Supply’ da ong u, ka um toh kawa emkam dooh hei jingim u bru, u bru ym ye u im khlem ka um, neitæ i daw emkam u sumar wa u syndong bha i ka iow lait ko nei jakhlia ne u man kawa chong kjut. Katkam wa man katni 1.1 Billion ngut ki bru haka pyrthai iap ki neidaw wym ioh de ki ia ka um kawa khooid, 3900 ngut iap ki khynnah haka pyrthai chisngi neidaw ki khniang kjut wa em haka um katwa ha India won 1000 ngut chisngi iap ki.

Ong haroh u 70% i jakhlia ki um mih ki naki tngit wa kai na ki karkhana heh neidaw wa noh khaler ki ia ki jhep wa pynmih ki. I duna won ki um thlu toh neidaw wa boon bru, i tih mar poh khyndaw, i mih i roi ki kharkhana, i pam pathar ia ki dein ki seij kamte kyntu u ia ki paidbah wow syndong bha ki ia ki um kamjooh ki um wa ioh na u slap.

U Somiki Najiar da batai u hajrong ka ‘Sanitation’ kawa mut wa kammon u pyllang wa u noh ia ki jhep wa mih na man ki iung kiwa noh i man ka sngi khnang yow lait nei tngit ka soodong sookun ka chnong ka thaw. Ia ki jhep wa ye u man sboh toh u noh ki chithaw iow ioh u pynemkam hei thung i tep, ia kiwi won ki wym man sboh leh dang em boon ki lad wa ye u pynchna ia ki khnang iow lait ki u sepia ne pyndap thaw man da noh ia ki.

Hei iatoh waka bei rymmaw da batai da u Samdakiyo Shullai, heiwa da ong u, i ki bru wa chnong wa sah ha sla pyrthai ym hoi u lehbein iaka dei wow pam pathar ne thang iaki khlo ki kjam. Toh u burom bha ia ka neibhah waroh i emkam iong u bru ioh i naka, nadooh i bam i dih ki sula ki thad wa kiwi.

Hachwa  kani ka pynche paidbah da ioh i klam waiphang na u Hambiness Passah,  i ngooh blai jar jar i mynsien, pynbood i puræ poitry naki khynnah skur ka Loompyrdi Iongpiah. Da em leh i khana parom ia i jingim u Mahatma Gandhi lyngba ki dur wa da leh da u Wyraiki Kharbuki.

Share this:
Share on Facebook15Tweet about this on TwitterGoogle+0
Advertisement ad1