15 49.0138 8.38624 1 1 4000 1 http://wyrta.com 300 0

Pynup burom ka Panaliar ya u Saron, kular u wow yarap T. 10 lak

0 Comments
Advertisement ad1

Jowai: Ka Dorbar Chnong Panaliar Jowai, kam i dak sñiawkmen sñiawburom ya u khon ka chnong u Saron Pasweth uwa da jop kam u MDC naka 19-Jowai South Constituency, haka miet ka 16 tarik da chim ko ka bynta wow pynkup burom ya oo haka yalang wada pynman ha Yung Walieh ka chnong hei ya sakhi lang ki paaid ka chnong natlor ki waheh wasian.

Katkam i ktien yahkhmat na u R. Thawmon Bamon, Assistant waheh chnong da ong u wa kam ini i jait pynkup burom ka chnong neipor cheipor jooh leh ko ya kiwa heh wa sian kamjooh ki khon chnong hajrong i wanrah ki yei naam i burom ya ka chnong.

U Arwotki Sumer Treasurer ka Panaliar hawa e yei klam da ong u i em u Saron e mynsiem u wow kreh chitom yoe pynman ya i wow poi sakhiat u cha ka thong i jop natlor wa em haroh u ya le tylli ki ki thong wa ki paidbah ngait ki oo.

“Boonsien ki paidbah beiñ ki lym ye kiwa mihkhmat u pynbiang yei emkaam samen yong ki, tangwa ym sñiawthooh won ki yei eh i khoo yong kiwa mihkhmat, iwa emkaam hi toh u pdiang næ kmen la kat iwa ye ki u lehbha yaka chnong ka thaw wa yaka jaitbru” ong u Arwotki Sumer

Da kyntu u yaki paidbah wow chim wa i thap Vote toh wow jied ya kiwa yahkhmat wei ym toh wow chim kam ka kaam Politics hei im wa man ka sngi.

U waheh chnong ka Panaliar u Riquoma Laloo, e u i kyrkhu kyrdoh ya u Saron yow ye u kreh yei kaam wa bha tam kamjooh wow yah luti yaka ri ka jaitbru haki snem wow wan, wei dap u da i sñiawsarong wow yoh u MDC pyn naka chnong heiwa daka kyntu u ya oo wym hoi u mylliñ u yaka chnong, wei ka chnong leh ymhoi won leh u khwan ko khang yow yoh bhah lang kiwi ki chnong yong ka Constituency.

Neitæ da ong u wa i ye u pynman ya kani ka pynkup burom toh i em i ki waheh wasian wa em i mynsien ya krehlang, i mynsien wow ya kyntu para i. Kamtæ yoo luti u wow dang pteiñ i em kam ini i mynsien khnang yow ye u pynku yeibha i miat ka chnong.

Neiliang u Saron Pasweth hawa e yei klam da e khublei u ya waroh kiwa kyrchaan ya oo hadooh wa poi u haka thong i jop. Da ong u “Ini i jop dang toh i jop yong ki paidbah kiwa da jied ya nga, katwa i jop yong nga won u man i hadien wada ye O u leh bha næ wanrah i roi i paar ya ki paidbah”.

Da khana u wa hei lai luti yong oo nadooh dang khian man u u bru wa jop la heiwon heiwon ki kaam wa oo leh u, kamtæ chwa wow yakhun u ha ka Election MDC leh da pyrkhat jngai bha u neibynta ka chnong ka thaw kamjooh ka Constituency waroh kawi, weiwa waroh iwa mut wa mang u man i iwa jop, deiwa kyrchaan lang kiwa heh wa siañ nadooh ki manbei manpa ki khynroo khyllood.

Ong u wa nyngkong thooh u yaka yingkeiñ yow kaap cha ka JHADC, neitæ ki chrot skit wa skem wow ya kyrchaan, kamtæ kamwa ye wow pynskem yaki chrot da yoh sakhiat u wow chong haka JHADC, wei iwa sah katu sa kammon u pyntoh pynbiang yaki.

Kamtæ paan u ya i ya krehlang ka shnong ka thaw kamjooh ki paidbah neibynta wow ye u wanrah i roi i paar yaka ri waka jaitbru. Heijooh i por leh pynbna wa ka chnong u yoh yarap ko lyngba yong oo kamwa T. 10 lak naka Special Assistant Grant Scheme.

Yei bynta pynkup burom ya u Saron da pyndep da u waheh chnong u Riquoma Laloo, natlor wada pynchong chit choooh chooh ya kani ka kynta pynkup burom da ki rwai ki chaad naki khon khynroo khyllod ka chnong.

Da pynkut yaka yalang da ki ktien e khublei na u Careme Phawa General Secretary Panaliar.

Share this...
Share on Facebook
Facebook
Tweet about this on Twitter
Twitter
Advertisement ad1
Advertisement ad1
Previous
Next

0 Comments

Leave a Reply