15 49.0138 8.38624 1 1 4000 1 http://wyrta.com 300 0

Saam khusnam ka HANM cha ki bru wa kreh neibynta ka jaitbru

0 Comments

Jowai: Ka seiñ Hynniewtrep A’chik National Movement (HANM) Laskein Block Circle, da pynman ko ya ka saam khusnam næ ka pynkup burom kawa le, kawa tip kam ka “Award Cum Literacy Certificate” cha ki bru kiwa ka seiñ da yoo ko ya i kreh chitom yong ki haki kaam næ ki bynta waphær waphær neibynta i bha i miat yong ka jaitbru wei ya ka ri, kawa pynman ynne ka sngi ha Khat Ar Nor UP School, Shangpung Pohshnong West Jaiñtia Hills District.

Yaka yalang da pynlai da u E.J. Law President HANM LBC, katwa u President HANM CB, u Lamphrang Kharbani da man u kam u kongsan. U Lamphrang hawa klam ynne ka sngi da ong u wa i saam ya kam kini ki khusnam han la man ko ka khusnam kawa khian leh tangwa man ko kam ka dak næ ka nongmuna wow pynchlur chooh chooh yaki bru kiwa kreh chitom neibynta ka bha ka miat wa ka myntoi yong ka jaitbru hi waroh.

Advertisement ad1

Da ong u wa kani ka saam khusnam ka seiñ da jooh e næ da leh da boonsien neibynta wow pynchlur wei e mynsien ya ki bru kam haki kaam chakri paidbah, kaam leh Sports, ki kaam thoh kot wa kiwi kiwi de kiwa wan rahnam wei burom yaka yung ka sem wa ya ka jaitbru hi waroh.

U Boby Basaiawmoit, General Secretary ka seiñ, hawa klam u da ong u wa i saam ya kam kini ki khusnam man ko wow pynchlur ya ki bru kiwa kreh doh wa mynsien wow e ya ka chakri ya ki paidbah wa yaka ri khlem da em iwon iwon i thmu wow yohnong hadien habood, tangwa da sai ki ya ka chakri du neibynta i bha wa i myntoi ka jaitbru waka imlang ka sahlang.

Ynne ka sngi ka seiñ da saam ko ya ki khusnam cha ka Rianom Suchiang kawa kreh kam ka Anganwadi (ICDS) yong ka Lumlyntur na Shangpung, u Shempahng Manar na Shangpung uwa pawnam ha i chna sur wa i rwai, u Ialambha Dhar, na Jowai ha ki kaam thoh khubor, u Heibormi Sungoh uwa thoh kot wa uwa rah leh wow pyntipmit ya ka ktien Pnar ha ki Seminar wa kiwi kiwi de ki kaam wa da leh u.  

Ha kani ka yalang da em leh u John Sangma, President Border Area (Ranikor), Michael Kharmuuti Assistant Secretary CB, u Sain Basaiawmoit Working President North Khasi Hills wa kiwi de kiwa da chah khut sñiawbha cha kani ka yalang saam khusnam.

Advertisement ad1
Advertisement ad1

0 Comments

Leave a Reply