15 49.0138 8.38624 1 1 4000 1 http://wyrta.com 300

Takha u SP (City), chah thang san tylli ki kari, chah kem boon ngut ha i awri ha sor Shillong hadooh ynne ka sngi

0 Comments

Jowai: Hanlada da pynkrehkaam ya ka Curfew ynne ka sngi leh da em biang i pynyoo bor hapyrdi ki pulit wa ki paidbah hajan YMCA wei i daw toh wa ki paidbah wa ki manbei da tia biang ki cha Motphran.

Ki pulit da khang ki ya ki paidbah wow lai ki chakhmat wei heitæ i por da em i tba kti hapyrdi ki paidbah wa ki pulit wei ki pulit da siat ki ya ki kattu katni ki bom pyn-jhia khmat wei ki paidbah da sdang pra ki.

Ini i kulmar ynne ka sngi da sakhi wada joor i wei da em da ki hajar ngut ki paidbah ki wada kwah wow hiar thma ya ka Themmator hadooh wa ki pulit ymye de ki u leh katwa em, hanlada da rah ki leh ya ki kattu katni ngut ki bru wei i yakhih da neh i kattu da palat 24 kynta. Ha i pakhot moo ki paidbah da mynsoo kattu katni ngut ki pulit wa kynthup ya u SP (City), u Steve A Rynjah.

Hajrong ini ki le seiñbhalang wa kynthup ya ka KSU, FKJGP wa ka HNYF da dawa ki na ka sorkar wow kem noh ya ki bru kiwa man i daw yong ki wa sdang ini i yakhih.

U President ka FKJGP, u Wellbert Rani da ong u wa ki le seiñ dawa ki wow kem ya ki bru kiwa emkti hei wow dat ya ki le ngut ki khynnah Khasi hapoh 24 kynta, wei da dawa leh na ka sorkar wow kyrriah noh ya waroh ki bru wa sah ha kani ka thaw cha i thaw wada mang neibynta yong ki.

Da ong u wa kini ki bru da leh ki ya ki kaam wa pyrchah aiñ neibhah wada sdang ki wow wanrah ya i sñiaw yaphær jaitbru.

Katwa neiliang u President ka KSU, u Lambokstarwell Marngar da ong u wa ini ymtmoh ka sien wa nyngkong wa kini kiwa sah ha kanika thaw da leh ki ya kam kini ki kaam, deiwa pynrap wa kani ka thaw man ko ka thaw wa kdup ya kiwa wan sah tooh chapoh ka jylla.

Katwa u Genral Secretary ka HNYF, u Sadon Blah da ong u wa ka sorkar toh u pynbiang ko yei bai lutsan wa ka sumaar ya waroh kiwa da mynsoo na ini iwa jia.

Neiliang u Deputy Commissioner ka EKH, u PS Dkhar khnang wow pynduna yei awri da khut yalang u ya kiwa synchaar chnong wa ki MLA ki le tylli ki Constituency wa kynthup ya u MLA ka West Shillong, North Shillong wa ka Mawlai Constituency wow yoh yei yakrehlang wa ki.

U PS Dkhar da ong, u wa ha ka yalang da em wa e yumut mar kylliang wow wanrah biang ya i chongsuk wei iwi na kini iwa da wanrah da kiwa boon toh wow kyrriah noh ya ki bru na ka Themmator, Iew Mawlong, yeiwa da ong u wa daw pynsñiaw u yeini cha ka sorkar.

Neiliang u Superintendent of Police ka EKH, da ong u wa ki pulit ynne ka sngi da kem noh ki ya uwi u bru wa emkti wow dat ya ki le ngut ki khynnah hadien ka ujor na kiwa yah ya ki bus rong soo wei i takit dang lai i chakhmat.

U SP da ong nu leh wa i kulmar da mih i hadien wa kawi ka bru na Themmator da pynbaad ko wa kini ki khynnah da klam khlemakor ki ya ka heipor wa phah kyrriah ya ka bus, wei neidaw wym kyrriah ki da lai khut ko ya ki kattu katni ngut kiwa da dat ya kini ki khynnah.

Da ong u leh wa kini ki khynnah kiwa na Mawlai da mynsoo ki malum malæ tangwa du neidaw wa poor smat ka khubor lyngba ki Social Media ini i jia da heh i wei da mih i kulmar.

Da ong u leh wa ynnin i miet da chah thang san tylli ki kari wei boon ngut da chah kem ki ha ki pulit.

Neiliang u pa yong kini ki khynnah u Skailin Roy Marbañiang na Mawlai Lummawnei, uwa yah bus soo da ong u wa ka aiñ daw kem noh ko ya ki bru wa emkti heini khnang wa ini i awri u kut noh i. Kini ki le ngut ki khynnah da chait ki lait noh i takha na khlieh wei ymtoh kamwa thoh ha ki Social Media wada em uwi na ki uwa da khlaad.

Ha kawi ka liang, uwa mihkhmat neibynta ki dkhar, u Fr. ka Hari Sabha CNI Church kawa em ha Iew Mawlong, u H. Masi da ong u wa ka aiñ toh u kem ko ya kiwa emkti wei da kyntu u ya ki paidbah wa ymtoh u wanrah ki yei yaphær jaitbru na ini iwa jia wei emkaam wow ngooh blai wow yoh biang yei chongsuk.

Da i lai paidbah pynman ka WJMSS ha ka sngi &#....

Previous

Da pynkrehkaam sa da ka Night Curfew ha waroh ....

Next

0 Comments

Leave a Reply