Jowai: Ynne ka sngi ka yungbichaar ka Meghalaya High Court hapoh i bichaar u Justice Dibesh Maheshwari, Chief Justice da chong bichaar ko ya ka mukotduma wa ujor u S. Langi pyrchah ya ka hukum ka JHADC wow pynhiar chuki noh ya oo kam u Waheh Chnong ka Ummulong.
U Langi da kam u wa da jied ya oo kam u Waheh Chnong ka Ummulong nadooh ka 07.02.2015 neibynta le snem wei da ujor u pyrchah ya ka hukum ka JHADC wa pynmih ha ka 24.11.2017 heiwa da pyndam ya oo kam u Waheh Chnong ka Ummulong. Hei yatoh wa ini oo da ong u wa da chah pynhiar u neidaw wym em khut ya ka Dorbar ka chnong.
Neiliang ki Muktiar ka Council da ong ki wa ka JHADC bien hi ko wow pyndam ya ka hukum wa pynmih ko lada ye u khut smat ya ka yalang yong ka Dorbar Chnong.
Neiliang ka High Court da hukum ko deiwa ong kamni hawah:
- Ka rai yong ka Council ha ka 07.11.2017 wa ka hukum ha ka 24.11.2017 u pyndam noh ya ka.
- U Waheh Chnong toh u khut u ya ka Dorbar Chnong hapoh chi tayaw, namo ha ka 12 tarik uni u bnai wei u Dolloi ka Elaka Jowai u Puramon Kynjing u man u kam uwa sakhi (Observer).
- Kani ka Dorbar u pyntikna ko yei boon paaid kiwa kyrchaan namo kiwa pyrchah ya u Langi wei wow ap yei eh i khoo kiwa chong chnong.
- Hadien ini u Dolloi toh u phah u ya ka bui (Report) cha ka EC ka JHADC hei yatoh wa kani ka yalang.
- Ka EC toh u chim ko ya ka rai katkam wa bui wa da yoh deiwa bood ya ki kyndon ka aiñ.
- Da phah leh ya ki bor District wow chimkhia ki yeini deiwa phah ya ki bor pulit wow sonteri ki ha kani ka sngi pynman yalang Dorbar Chnong.
Hadien wa chong bichaar ya ini waroh ka JHADC ye ko u leh ya iwon iwon iwa yoobiang ko katkam ka aiñ ka yong ka.
Discussion about this post