15 49.0138 8.38624 1 1 4000 1 http://wyrta.com 300

Wan pynhaap pyrda u Lahkmen yei dap 25 snem ka Kurimai LP School

0 Comments

Jowai: Ka Kurimai LP School Dongmihsngi Ladthadlaboh, Jowai ynne ka sngi da pynhaap pyrda ko ya ka lehkmen dap 25 snem i chakri yong ka neibynta wow kyntu kynrong ya ka imlang sahlang heiliang i stat i tip.

Ha kani ka sngi u montri ka chnat puræ puthi, u Lahkmen Rymbui da man u kam u kongsan.

Advertisement ad1
Advertisement ad1

Ya ka yalang ynne da pynlai da ka Isapaya Shullai kawa man kam kawi na kiwa sikai ha kani ka skur, wei ya ki kyntien pdiang burom da yoh na u Rev. S. Laloo uwa man leh kam u Chairman ka SMC yong kani ka skur heiwa da yoh leh ya ki kyntien ngoohblai na u Rev. H.H Mohrmen, i klam kamjooh i parom wa tbian yei lai luti kani ka skur da yoh na u L. Laloo uwa man kam uwi na kiwa sdang ya kani ka skur.

Ya kani ka skur da sdang nadooh ka 25-02-1993, wei kamwa man katni ka skur da em ko ha ka LP Section 5 ngut kiwa sikai heiwa 2 ngut da toh kiwa da yoh yarap na ka District Council, 2 ngut na SSA katwa uwi won da thung na ka SMC.

Ha ka UP Section kawa kani ka skur da ku kyrdan ko katni, 4 ngut da thung na ka SSA katwa u wi da su na ka SMC, ki khynnah skur hadooh katni em ki 200 ngut.

Da e khublei u leh ya kiwa sikai wa kiwa yarap kiwa da em nadooh wa sdang deiwa kyrmen wa kani ka skur daw ye chooh u pynheh pynkmai ha ki snem kiwa daw wan katkam wa lai ki por.

U H. Shullai uwa man u waheh chnong ka Dongmihsng, Jowai da yaroh u ya kani ka skur kawa da e i chakri ymtoh du kat ya ki khynnah kiwa lai skur dei sngi, tangwa da sdang leh kiwa sikai wow pynman ya ka skur miet ha kani ka jooh ka skur, man i iwa yarap hadooh kattæ kattæ khamtam ya ki khynnah kiwa mut u pep skur chiteiñ por, heiwa lyngba i kreh chitom kiwa sikai chiboon ki khynnah yoh biang ki u pteiñ yei lai skur yong ki.

U Lahkmen kam u kongsan ha kani ka sngi da e u i yaroh ya ka skur, ya kiwa sikai kamjooh ya ki kiwa yah khmat niam heiwa da ye ki u leh ya ki kaam wa bha lyngba kani ka skur.

Da ong u leh wa i em yong kani ka skur man ko ka yarap ya ka sorkar hei won wanrah yei tip i stat nei bynta ki khynnah wei heijooh i por da kyrpaad u ya ki khynnah skur wow pynemkaam hok ki ya ki sap ki yong ki ym toh ware u chkeh ki du kat ha bor stat kiwa katni (technology) kiwa yoh i u pait suk namo wow bood (Copy) donhi, neibhah boonsien kani pyntlot ko ya i bor jabeiñ ki khynnah deiwa leh ki ya ini. Chooh chooh da ong u wa ki khynnah kiwa lai skur katni emkaam haroh wow booh ki ya ka thong ymtoh du kat wow yoh kreh sorkar wei wow thooh laad haroh wow yeiñ ha ki kjat yong ki hi.

Khaddooh kyntu u ya waroh ki khynnah wow sniawthooh ki yei kordor i puræ puthi, i khooid i jngiar khamtam heiwow pynneh pynsah ya ka spah rymaw, heijooh i por paan u yei yakrehlang na kiwa chong chnong waroh hei wow wanrah ya ka imlang sahlang kawa ku ha waroh ki liang.

Ha kani ka sngi da saam leh ya ki khusnam (award) cha kiwa saiñ ya kani ka skur, ya kiwa sikai, kamjooh ki bru kiwa embynta wow yarap ya kani ka skul.

Da saam leh ya ki naam jop ya ki khynnah kiwa da chimbynta ha kiwa boon ki yalehke kiwa da pynman waroh chi snem.

Neiliang kiwa pynlai skur da e ko leh ya ka dorkhat neibynta wow yoh yarap na ka sorkar.

Da pynlait paidbah leh ya ka kot wow sah kynmo (Souvenir) wei da pynphooh pynpheiñ ya kani ka lehkmen da ki chaad kamjooh ki rwai na ki khynnah kani ka skur.

Yei klam e khublei da yoh na ka P. Laloo kawa man kam ka Head Teacher.

Advertisement ad1
Advertisement ad1

Jop u Shanborlang Chullai waka Elizian Dkhar h....

Previous

Kynmoo warom ka KSU ya ka sngi yap u Bull N. L....

Next

0 Comments

Leave a Reply