15 49.0138 8.38624 1 1 4000 1 http://wyrta.com 300

Wan wai u Kyrmen Shylla ya ka Community Hall ka chnong Mukhaialong kawa T. 57 lak

0 Comments
Advertisement ad1
Advertisement ad1

Jowai: U montri ka tnat Social Welfare & Revenue ka sorkar jylla u Kyrmen Shylla ha ka 12 tarik da wan u wow wai ya ka Community Hall ka chnong Mukhaialong kawa da chna hei lut kamwa T. 57 lak.

Da sdang wow chna ya kani ka yung ha u snem 2007 wei da pyndep yaka ha uni u bnai deiwa yarap ka tnat DFO Wildlife Division kamwa T. 15 lak, ka scheme chispah sngi yong ka chnong kawa T. 10 lak nalor i noh kyllooid ki MLA wa MDC warim ka thaaiñ katkam wa pyntip u Hundred Phawa, Secretary Chnong.

Advertisement ad1
Advertisement ad1
Advertisement ad1

Ka H. Lato MFS DFO Wildlife Division Jowai, hei klam yong ka da ong ko wa da yoh wow e poisa toh lyngba ki artylli ki khloo wa kynthup ya ka Khloo Pohblai Moochutia wa ka Khloo Thangbru Umchympu kiwa ka chnat nadooh u snem 2014 da tipmit ya ki kam ki Community Reserved Forest.

Hei yatoh waka Community Reserve Forest da ong ko wa ka Khloo Pohblai Moochutia man ko kawa boon ki jait mrad hadooh kawa em hadooh 70 tylli ki jait sim waphær waphær wei da em ko leh kiwa boon ki dawai kynbat (Medicinal plant) kiwa e dawai yei ki wow pynmih ki jait dawai na kani ka khloo.

Kamtæ da kyntu ko ya kiwa chong chnong wow pynneh pynsah ya ki khloo wow pyneh ya ki mrad ki mreng, ki jait sim waphær waphær kiwa hadien won yow ye u sdang ya ya ka Eco tourism wow leh kam ya ki pait ya ki jait sim wa em heini i khloo namo ka Bird Watching kawa ki bru na kylleiñ kylleiñ daw wan ki wow pynlut yei por wa ka poisa yong ki.

U kongsan u Kyrmen Shylla hei klam yong oo da yaroh u ya ka chnat Wildlife wa ki sahep yong ka kiwa da kreh chitom wow yarap ya ki neibynta wow myntoi ki paidbah wa chong chnong wow man ko ka kaamram yong kiwa chong chnong wow sumaar ya kiwa da e ka rymaw wei wow ya krehlang neibynta i bha i miat i roi i paar yong ka chnong ka thaw.

Ha katai ka sngi da yoh leh yei klam na u PS. Nongbri IFS Conservator of Forest Wildlife wei da emlang u Waheh Chnong ka Mukhaialong u Rimiki Sana, ki Secretary Chnong na kiwi ki chnong wa ki paidbah wa chong chnong wa kynthup ki manbei manpa ki khynroo khyllood wa ki khynnah khian ha ka yalang kawa pynlai da u Tyrnit Pdeiñ, Chairman Community Hall.

Chi bnai epor ka sorkar ya ki District Council....

Previous

I kyntu na u SP(T) ka EKH heiyatoh wa i pynyie....

Next

0 Comments

Leave a Reply