15 49.0138 8.38624 1 1 4000 1 http://wyrta.com 300

Wow pynsñiawthooh chaphang ka MNREGA, da ka yachemlang ki VEC ka EJH pynman ki bor sorkar

0 Comments

Khliehriat: Ka yungkrehkaam yong ka District Rural Development Agency, East Jaiñtia Hills District chirup i krehlang wa ki BDO ki tnat krehkaam waphær waphær ynne ka 12 tarik da pynman ki yaka yachemlang wa nynkong wa ki Village Employment Council (VEC) Ha Conference Hall Khliehriat West.

Yeini da leh kam chi bynta u pynsñiawthooh ya ki dkhot ka Village Employment Council (VEC) yong ki chnong waphær waphær wa haap hapoh ar tylli ki Block ka East Jaiñtia Hills District, hei yatoh waka scheme MGNREGA.

U Deputy Commissioner East Jaiñtia, u M.S.Lhuid uwa man leh u Chairman ka MGNREGA hawa e u yei klam da ong u, kani ka scheme MGNREGA toh ka aiñ wa da booh da ka sorkar nadooh u 2005 yow yoh kreh yoh khih ki thaiñ nongkyndong. Wei hawa ong ka aiñ pynyoo da em ki kyndon wa ki paaid kiwa chong chnong ha nongkyndong ye ki u paan yei hok yow yoh ki u kreh 100 sngi haka chi snem na kani ka scheme sorkar kawa da pynkrehkaam lyngba ki Block Office kamjooh lyngba ki VEC ha ki chnong ki thaw.

Da ong u wa kam kiwa yahkhmat næ ki dkhot ka VEC emkaam u tip ki kammon i rukom pynkrehkaam ya kani ka scheme yow man i iwa jop, neibhah lada kiwa yahkhmat ym sñiawthooh ki yeiyi wa da booh kyndon ha kani ka aiñ ymye ki wow pynlai bait haki chnong ki thaw yong ki neitæ i daw emkaam bha kam kani ka yachemlang yow yoh ki yei pynche naki sahep kamjooh leh ye ki u kylli yei wym sñiawthooh ki.

Neitæ da ong u wa ha kini ki sngi da yoo haki khubor wa em kiwa yahkhmat yoosar ym sñiawthooh ki ya ki kyndon da pynemkaam bakla ki ya kani ka aiñ, wei mih boon i awri awra. Kamtæ kam kiwa yahkhmat emkaam wow em ki i kitkhlieh kamwa da jied ki paidbah yow man ki kiwa yahkhmat wa wanrah i roi i paar haka chnong ka thaw.

Da ong u wa haka Ri kiwa chong chnong rap boon ki cha nongkyndong wei iwa em leh boon i duna hei roi i paar tæ lada duna i yakreh lang ki VEC waki tnat sorkar ymye u wanrah i roi i paar.

Da khana u leh wa ini wa dep em haroh ka scheme PMAY neibynta ki manyung wa dooh ha nongkyndong tangwa duna bha kiwa wan chakhmat wow chim kabu yaka.

Ka R. Mannar kawa man kam ka Joint Director ka DRDA da e ko i batai bniah hei yiatoh wa kani ka aiñ kamjooh i rukom pynkrehkaam ya ka wei da kyntu ko leh ya ki VEC wow chim kabu ki neibhah dang boon ki man yung wa emkaam u yoh i yarap.

Ha kani ka sngi neiliang ki tnat krehkaam waphær waphær leh da e ki i batai hei yatoh wa kiwa boon ki scheme wa ye ki u yoh lyngba ki tnat sorkar kynthup ya ka Medal Challam APO ka Wapung C&RD Block, Dr.W. Ryngkhlem District Veterinary Officer wa kiwi kiwi.

Previous
Next

0 Comments

Leave a Reply