Advertisement ad1

Jowai: U Sajay Laloo uwa booh mukotduma ha ka NGT pyrchah ya ka sorkar Meghalaya da thoh u cha u Chief Secretary ka Jylla hei yatoh wym em pynkrehkaam ki tnat sorkar waphær waphær ya ka hukum ka NGT wa pynmih ha ka 10 Naitung 2017.

Ha ka chithi da ong u wa ka sorkar da yooluti ko wa ka Jowai Municipal Board (JMB) wow pynim wow yada ya ka wah Myntdu tangwa ka JMB pyndaka man ko kawa kjut kawa ym ye tang u su tulop ya kiwa kreh ko wei lait noh na ki thaw noh jhep wa khian (wa yoh naka Swachh Bharat Mission) wa booh ko cha rood sarok ym em ko da ka yong ka hi ka thaw noh jhep wa heh yow noh jhep ha kylleiñ ka Jowai.

Advertisement ad1

Da man i iwa bakla lada ka sorkar ym sñiaw ko wa ki tnat Water Resources, Forest and Environment, Excise, Urban Development, Public Work Department (Road and Bridges) ym em ki i kaamram wow yada ya ka Wah Myntdu kawa pynbiang pyn im ya ka chnong Jowai.

Hadooh katni ka tnat Forest and Environment waka Water Resources ym pu em leh ki yeiwa emkaam wei ka Urban Development Department deilang wa ka District Administration ym pu em pynsangeh ki ya ki yung wa dang chna ha rood kani ka wah.

Ka tnat Forest and Environment deilang wa ki pulit toh u booh ki ya ki Forest Ranger wa Forest Guard tymbud ka Wah Myntdu yow ye ki u khang ya ki kaam be-aiñ wa leh ki paidbah.

Man i iwa da tip lut wa ki dooid ki liar na chnong Jowai kiwa chna wei pait da ka Public Works Department wa ka Urban Development ym em ki iwi leh i thaw pynkhooid ya ki jakhlia wa mih na kini ki dooid ki liar wei waroh kai ki cha ka Wah Myntdu.

Ki klong kiad kiwa toh i bah khlieh da ka tnat Excise da noh ya ki kylleiñ ka chnong wa cha rood ka wah kamjooh ki baam ki plastic wa ieh ki bru wa wan ke cha Syntu Ksiar da lang da boon ki katwa dang lai ki sngi.

Ka JMB deilang wa ki bor district ka West Jaiñtia Hills Administration da dep pynman ki ya ka yalang paidbah yow paan kyrchaan na ki paidbah wow krehlang ki waki wei ka JMB da kwah pathan ko wow pynmih poisa na ki paidbah hei thaw wow li paan poisa na ka sorkar wei yeini da klam che ka hukum ka NGT wa lada chitom poisa ka JMB toh u li paan poisa ko na ka sorkar jylla.

“Lada waroh ki 25 chnong wa em ha Jowai kynthup ya ki wym em hapoh Municipal leh su ki cha ka Municipal ya ka Touse Tax wa kiwi kiwi kattæ leh ym tam ko ya ha T. 50 Lak chi snem tæ kani ka poisa u lut ko du hei su tulop donhi iwa mut wow pynkrehkaam ya iwa emkaam u kreh ko ympu ye u leh iyi iyi leh” da ong u Sajay.

Da ong chooh chooh u wa ka Municipal ym ye ko u lute namo u phah su poisa ki ki paidbah neibhah neibhah wow pynkrehkaam ko yeiwa da ekti ha ka.

Lait noh na ka tai ka yalang paidbah ym em de leh ki iyi iyi yow pynkrehkaam ya ka hukum kam wow pynman ya ka survey yow thooh thaw chna ya ka Sewage Treatment Plant ha Jowai, u pynkrehkaam ya ka Environment, Rivers and Water Bodies Preservation Policy wa kiwi kiwi.

Ka Public Works Department toh u lai pait biang ko sa chisien ya waroh ki dooid wa chna ko wei wow booh ya ki Solid Waste Filtration Pits man ka 50 meter. Ka PHE won toh u chna ko ya ki paikhana ha ki thaw ka Jowai kiwa dang lai paikhana cha lait.

Ka sorkar emkaam ko wow booh poisa wow leh du yeini lada ym kamtæ waroh i pyrchang ka NGT daw man i iwa sepai.

Ya kani ka chithi leh da phah cha kiwi tnat sorkar kamjooh cha u DC ka WJH.

 

Share this:
Share on Facebook0Tweet about this on TwitterGoogle+0
Advertisement ad1