Shillong: U MLA ka KHNAM na North Shillong, u Adelbert Nongrum ympu em u rai u wow psiah cha ka dhab ki MLA wa tip kam ka ka United Progressive Front (UPF).
Hawa yaklam wa kiwa pathai khubor, u Adelbert da kubur u wa da tyrwa ki ya oo wow emlang ha kani ka dhab tangwa oo ympu chim u ya kawon kawon ka rai neibhah wa kwah u wow bichaar boi da chna ya ka du neibynta wow yoh kabu saiñ pyrthai.
Kiwa booddien wei kiwa pait bha ya ka saiñ pyrthai, da sñiaw ki wa kani ka dhab toh ka wow pynyoo bor donhi ya ka Regional Democratic Alliance (RDA) wa da chna da ka UDP wa ka HSPDP, kiwa em 10 ngut ki MLA.
U Adelbert da ong u wa du i sñiawkhia wow pynskem yaka sorkar ym em yumut ko lada ym biang ka synchaar neibynta ki paidbah. Da ong u leh la 47 snem da pynskem ya ka sorkar, wei da toh i por wow pait ya ki phang lada man ki kiwa biang, wei ye u wow psiah wa kawon kawon ka dhab lada yieñ ki wow yada ya ki tre jylla ym wow yoh myntoi samen.
Haka UPF da em 6 ngut ki MLA wa da chna da ki MLA wa kynthup ya ka PDF kawa em 4 ngut ki MLA, u MLA ka NCP u Saleng A Sangma, u MLA samen u Lambor Malngiang. Dadep thoh ki leh cha u Symbood Lamphang ka yung dorbar ha ka tayaw wa dadep wow tipmit noh ya kani ka dhab ha ka yung dorbar.
Waroh kini ki MLA emlang ki ha ka sorkar Meghalaya Democratic Alliance (MDA) wa yahkhmat da ka ka NPP.
Discussion about this post