Advertisement ad1

Shillong: Ka tnat Social Welfare ka jylla ka da pynsah ko khlem su ya ki bai baam yong ki Self Help Group (SHG) iwa da kynjoh hadooh T. 75 klur wei kani ka poisa toh ka wow su da ka sorkar cha ki SHG kiwa yoh wow saam ya ki lyngba ka scheme ICDS, da ong ka Bharatiya Janata Yuva Morcha (BJYM) Meghalaya.

Ha i pyllait khubor, u President ka BJYM, u Egenstar Kurkalang da ong u wa ini i leh ka sorkar jylla toh i thmu wow knieh noh ya i hok yong ki SHG, ki seiñ manbei, ki dhab kiwa pyndep ya i kaam, kamwa da pynkup bor da ka Yungbichaar wa ha khlieh dooh ka ri, ka Supreme Court nadooh u snem 2014.

Advertisement ad1

Katkam i ong u Kurkalang, ka sorkar jylla ym em de u su poisa ko cha ki SHG, seiñ manbei wa kiwi kiwi kiwa yoh u saam marbaam na kani ka scheme ICDS nadooh u snem 2015 hadooh katni. Ka sorkar da su tangdep ko ha u snem 2015-16, 2016-17 hanlada ka sorkar pyrdi lyngba ka tnat Women & Child Development da dep pyllait ko waroh ka poisa heipor wa biang.

“Ka phang wow kylli kattu toh wa heiwon booh ka tnat Social Welfare ya ka poisa wa da e da ka sorkar pyrdi, kammon u pyllut ko ya ka heiwa tang ya ka Bill ki SHG, ki seiñ manbei wa kiwi kiwi kiwa da pynkrehkaam ya ka ym yoh ki na kani ka scheme ICDS? Kani ka tnat sorkar jylla toh u pynche ko ya ini waroh” da ong u Kurkalang.

Da  ong u waka seiñ da yoh yutip ko waka Bill ka yong ka SABLA Scheme leh dang sah ko nadooh u snem 2013-14.

Da pynbaad u leh wa yoosar du neidaw wa ki SHG wa ki seiñ yong kiwa dooh ym ye ki u pynhun ya ki sahep wa ki montri sorkar da pynman ko ya ki wow chah pyndooh poisa ki. Da pynbaad u leh wa ki montri wa ki sahep sorkar kwah ki wow e khih e Contract ha ki bru yong ki hi khnang wow yoh ki wow yabhah ya ka poisa khamtam hachwa ka election.

“Ka BJYM da dawa ko na ka sorkar wow pynchitom ko ya kiwa emkti ha kam kini ki kaamtooh wei da booh ya ki SHG hei eh wei lada ym leh ki iwon iwon daw leh ko yeiwa emkaam wow boodien yeini” da ong u Egenstar Kurkalang.

Share this:
Share on Facebook0Tweet about this on TwitterGoogle+0
Advertisement ad1