Jowai: Haka lyngkhooh snem dap 132 snem i wan ka Balang Unitarian, u Rev. Sowat Laloo yooluti u wa ini i poi ka Anniversary u wanrah ko kiyi kiyi kiwa bha, kiwa khooid weiwa em burom, nalor wow em ka mynsien ya maap kylliang kamjooh yow ku na kawi ka kyrdan cha kawi won.
Ha kani ka Anniversary da pynkynmoo warom leh ya uwa wanrah yaka Balang Unitarian cha ri-loom Khasi Jaiñtia u Babu Hajom Kissor Singh Nongbri, kamjooh leh yaki waheh wasian wa hanla man ki kiwa duna i stat i tip wei maad ki boon i eh i khoo haki soodong sookun, tangwa ye bait ki wow leh iyi re iyi ya ki pateiñ katni, neibhah em ki yei mynsien chlur wow yieñ skem haka yurim i sakhiat.
Katkam ka phang yong uni u snem kawa ong “Bat la jingngeit, bat la jingkmen” u Rev. Sowat Laloo hawa e yei klam haka yaseiñ yong ka Balang Unitarian Jowai ynne ka sngi, da ong u wa i ngait toh i chaniah i sñiaw skem heiyi iyi wa i ngait i, wei i sakhiat hi waroh em i jar jiar i ngait hei im yong i.
Hawa kyruiñ won u chaki para wa ngait ka Balang Unitarian da booh phang kylli u deiwa ong, lada i kam kiwa ngait ye i mo wow bood wow leh yei yi wa da ngait i wei wada sikai ha i da ki manbei manpa hapoh ka Balang.
Da ong haroh u wa katkam i yoo i chem u, em le jait i rukom ngait wa kynthup i ngait haka niam tangwa wym jooh em won ksoh ki yei ngait, wa ar i ngait wa artatien næ iwa dei pynbor donhi, wa le won i ngait deiwa em i kyrmen weiwa kyrchaan yaka buit wei bor lyngba ki kaam næ i rukom leh yong ki, kamjooh leh kiwa yaineh hadooh wa kut i im ki.
Chooh chooh da booh kylli u deiwa ong, lada kam kiwa ngait jooh pynemkaam hok ki mo yei sikai niam neibynta u pynbha yaka yung ka sem, ka Balang, ka imlang sahlang, wei pyndep hi i mo ya waroh i kular wada khlai neibynta i ngait neibhah wa ha kini ki sngi im i haka juk wa boonsien kular i wow yakit yabah yei kaam ka Balang, wow noh kyllooid mynsien chaka Balang nalor kiwi won ki kular.
Kamtæ kyntu u wa kam kiwa ngait lada i kmen i yei ngait toh u leh iyi re iyi neibynta i ngait dei wow pynyoo da ki dak ki chin.
Neitæ heipor janmiet yong kani ka sngi won da em ka ya lai paidbah wada sdang na yungmane ka Balang ter ter u surok Mission Compound, Iongpiah, Dulong, Tpep Pale, Wah Nangbah wei mih ha Iawmusiang neitæ da pynkut biang ha yungmane ka Balang deilang i rah ya i diñ.
Discussion about this post