Jowai: Heiyatoh wa i pynkrehkaam ki bor District wow yada na u khñiang COVID-19 katkam wa phah ka sorkar pyrdi waka sorkar jylla, da sakhi wa ka Lockdown ha West Jaiñtia Hills da man ko kawa lai bait deiwa ya ksohktilang ki paidbah, heiwa ki yaw ki haat ki luti syngkieñ da man ki kiwa lyngam kiaw kiaw kaw kaw lait noh ki dukan Pharmacy wa wai.
Neiliang ki bor pulit da yang ki haki sarok bah ki yaw ki haat wa em kari wa lai wa wan yow phah liwan ya kiwa ym em yoh bor wow mih.
Hawa yatoh wa ini, u Deputy Commissioner ka West Jaiñtia Hills District u Garod LNS Dykes, hawa klam cha ki laad pathai khubor da ong u wa emkaam i ya krehlang ki paidbah wei da kyntu leh ya waroh kiwa chnong chnong wow bood ryntih wow pynkrehkaam ya kiyi wa toh u leh kamwa da batai daki bor sorkar kamjooh ka chnat yong ka chait ka khiah.
Katwa u Superintendent of Police, WJH u Lakador Syiem nalor wa kyntu u wow bood ryntih yaki hukum, kiwa da sikai waphær waphær wa da pynmih daka sorkar, da khut da wer u leh yaki seiñbhalang kiwa kreh neibynta ka jaitbru ka District wow sñiawbha wow wan chakhmat yow man kam ki Medical Volunteer haki kaam waphær waphær neibhah wa ka sorkar emkaam ko yaki Medical Volunteer.
Kamwa man kattæ da pyntip u wa ki Volunteer kiwa da ye wow yoh toh ki dkhot yong ki NCC, NSS, NYK wa Scout & Guide.
Discussion about this post