Advertisement ad1

Jowai: U Vincent H. Pala, MP Shillong ynnin ka sngi da e dorkhat u ha u Narendra Modi yow pynsñiaw yei pyrchah yei hukum wow pynkrehkaam ka sorkar pyrdi ya ka Prevention of Cruelty to Animals (Regulation of Livestock Markets) Rules 2017.

Ha kani ka dorkhat da ong wa kini ki kyndon (Rules) krehkaam kani ka aiñ da man ko kam ka aiñ thymme wei phær ko bak la bak naka aiñ kawa tip kam ka Prevention of Cruelty of Animals (PCA) Act, 1960 wei wow pynyaar yei bor ka aiñ chadooh ki yaaw ki hat ye u leh du dei mynjur ka Parliament i wym em leh yeini.

Advertisement ad1

Ka kyndon 38 ka PCA Act ebor ko ya ka sorkar pyrdi wow chna ya ki kyndon krehkaam kani ka aiñ kawa da em, tangwa ymtoh wow chna kyndon thymme hadooh wa da kylla wa i bor ka aiñ warim deiwa thap ya ki kyntien thymmye kam ka yaaw ka hat dai masi hadooh wow chna ya ki Committee ki wym chah ka aiñ PCA kamwa em hei bor yong ka.

Ki kyndon thymme yong ka Prevention of Cruelty to Animals (Regulation of Livestock Markets) Rules 2017 da pynkylla ko leh yei i yumut i ktien “Cruelty” iwa ha ka aiñ da ong ko dei kamwi.

Ha kani ka 2017 Rules “Cruelty” namo i lehbeiñ ya ki mrad da booh lang yei wow tynyap ya ki masi wow dai ya ki ha ki yaaw ki hat katwa ki kyndon warim won da ong wa u tynyap ya ki masi wow dai cha ki paidbah ym em mut wa chah lehbeiñ ki masi.

Katkam kani ki kyndon thymme, ki bru wa wanrah ya ki masi cha ki yaaw ki hat haap pynbiang ki ya ki kot ki sla wa ong wa ki masi wa dai ki toh ki wym toh wow chah tynyap wei uwa dai leh ym chah u dai ya ka masi lada uwa thied daw tynyap u ki.

Katkam ka aiñ, lada ki kyndon (Rules) wa chna thymme hapoh ka aiñ man ki pyrchah ya kiwa da kdaw chwa ka aiñ kini ki kyndon thymme toh u man ki ki wym ye u pynkrehkaam.

Share this:
Share on Facebook0Tweet about this on TwitterGoogle+0
Advertisement ad1
Advertisement ad1