Advertisement ad1

Jowai: Hadien wa da kut  ka chi taiaw i por wa da e u DC ia waroh kiwa chong dai harood sarok nadooh ki wa dai jhoor, dai bam, dai cha wa kiwi kiwi, ynne ka sngi u DC deilang wa ka tnat Police da lai li tympra ki ia waroh kiwa dang chong dai charood sarok.

Da sdang ia i pynsangeh chongdai nadooh na iaw chyiap heiwa da chem ki ym em de kiwa chong dai cha rood sarok hadooh ha phrang ophis DC. Ha jan thaw yieñ kari lai war dang em kattu katni ki dukan wa em harood sarok kiwa ka bor district da beh da tympra ki iaki.

Advertisement ad1

Ha ki thaw lai kjat ha iaw ki wa dai kwai dai jhoor waroh da phah pyllang ia ki. Ki siang tyngkong (platform) kiwa da ieh kiwa pynemkaam kiwa chongdai da rah da kit ha ka trok.

Ki bru sorkar wa dang ya tynrong ya ki mar ha trok.

Ong u DC wa ia ini i pyndam chongdai da leh hadien wa da ioh u boon ki ujor na ki paidbah hei iatoh wa pynwit kini ki dai rood sarok ia i lai i wan ki bru kamjooh leh ia ki kari mator.

Khana u DC wa ini i leh iong Oo toh wa da em ka hukom iong ka Supreme Court ka ri India ha ka mukotduma Bombay Hawkers’ Union And others vs Bombay Municipal Corporation and others  ka wa ong wym em wa em hok u pynwit ia i lai i wan ki bru ha ki thaw iong paidbah kam cha ki sarok wa ki luti lai kjat.

Ong u wa kani ka hukom krehkaam ko du ha ki thaw iong paidbah ymtoh cha ki thaw iong samen, iong ki bru. Na itae i daw da phah kynriah ia waroh ki wa chongdai rood sarok cha ka iaw iong ka CNI, Iaw Chiap wa ka Iaw Seiñraij.

U DC leh da ong u wa ha kani ka sngi da chem u boon ki dukan kiwa da kyntoor cha jan u sarok wa lai cha police station na waroh arliang. Ong u wa ia kini ki dukan toh da booh ia ki ha ka thaw ka Seiñraij, tangwa lada kattae leh katwa da tia ware ki cha ka luti paidbah te da e por u ia ka Seinraij wow leh ki ia i wa emkaam.

Ha i iaklam wa kini ki nong chongdai ha ini i thaw ka Seiñraij da ong ki wa ki da su bai dan ki man ka sngi cha ka Seiñraij wa kamjooh i bai thaw chisien chi snem.

Da emlang ynne ka sngi leh wa ki bru iong ka Seiñraij Jwai heiwa da ong ki wa da dep pyntip ki ia waroh kiwa chong dai ha ki thaw iong ka Seiñraij u kynriah ki cha jngai na u sarok.

U DC ong u ki wa chongdai harood sarok (Hawkers) toh kitu ki bru wa yieñ dai mar charood sarok, chna dukan da ki tarpal plastik, hapoh satri wa ki yung tin wa man kam ki dukan dai kwai wadong, wa kitu ki dukan khian wa em haphrang ki dukan heh wei kiwa ki nongthied duk ki u yieñ thied na sarok. Ia kini waroh hap pyndooh noh ia ki. Ong u dei wa tia ki charood surok ymtoh du i pynkhian pynkhynia ki ia ki luti syngkien da pynsih iaw ki leh ia kiwa em cha ki thaw dai wa em da ki  dukan paka hapoh ki iaw. Ha ijooh i por kini ki dukan sarok (hawkers) pyntngit ki leh ia ki thaw lai thaw wan ki piadbah.

Ki pulit dang kyrpad ki ya kani ka men u pynran ko chadien yei dukan ko.

Ong u leh ha kani ka Musiang kawa daw wan daw phah u da ki bru iong Oo kiwa daw peit lada dang em kiwa chong dai cha rood sarok, lada chem dow thap wei u kit ia ki mar ki ha ki trok.

Ha kiwi won ki sngi leh daw leh kamjooh hi. Da kyrpad u leh ia ki paidbah u iakrehlang ki wa ki bor district hei iatoh weini wa kamjooh leh u thied mar ki du na kiwa chong dai ha ki iaw ymtoh na kiwa chongdai charood sarok.

Share this:
Share on Facebook0Tweet about this on TwitterGoogle+0
Advertisement ad1