15 49.0138 8.38624 1 1 4000 1 http://wyrta.com 300 0

Da chim yaka rai ‘Shillong Declaration’ haka 22nd National Conference on e-Governance

0 Comments

Shillong: Ka National Conference on e-Governance ka sien 22 kawa pynman 2 sngi ha Shillong da poi ko cha wakut ynne ka sngi deiwa chim leh ya ka rai wow neh kynmoo kawa tip kam ka ‘Shillong Declaration’ kawa da booh ki thong wa ki luti ya ka ri heiyatoh waka e-Governance. Ki 10 tylli ki phang wa da jied toh kiwa da ya pyllu yumut ha kini ki ar sngi da ki sahep sorkar, ki bru chemphang ha kani ka kaam kiwa wan na 28 tylli ki jylla ka ri wa ki Union Territories.

Hapoha kani ka ‘Shillong Declaration’ da rai wa ka sorkar India wa ki sorkar jylla u ya krehlang ki yow suk ki tre ri wow suk u yoh ya waroh wa ka sorkar e yarap ko cha ki paidbah deiwa pynkrehkam smat leh yaka India Enterprise Architecture (IndEA) wei wow ye u pynemkaam du kawi ka Account yow pynemkaam ya waroh ki e-Government Application ha waroh kawi ka ri, yow pynskem leh ya ki e-Governance kiwa man kiwa jop wa da sdang da ki sorkar jylla wei wow sdang ki leh cha kiwi ki thaw deiwa pynmiat pynbha chooh chooh ki, yow pyntikna wa ki phone network em ki ha waroh ki thaw ki jylla ka North East, u pynku yei sap ki bru wow chna ya ki tiar Electronics deiwa booh ya ki thaw wow e sikai ha Shillong, yow pynchlur leh ya i pynemkaam ya ki e-Office yow pynduna ya i pynemkaam ya ki kot sada ha ki State Secretariat ki jylla North East kamjooh ha ki District, wa kiwi kiwi de ki rai.

Haka sngi pynkut da yoh leh ya i klam na u P.S. Thangkhiew, Meghalaya Chief Secretary, u K.V. Eapen, Secretary, Department of Administrative Reforms & Public Grievances (DAPRG), u V. Srinivas, Additional Secretary, Department of Administrative Reforms & Public Grievances (DAPRG), Government of India wa naka R.V. Suchiang, Additional Chief Secretary, Government of Meghalaya hei emlang ki shaep sorkar pyrdi, sorkar jylla wa ki Union Territories nalor kiwa da chah khut sñiawbha wa kiwa mihkhmat ki Company ki bru samen.

Ya kani ka National Conference on e-Governance da pynman da ka Department of Administrative Reforms & Public Grievances (DAPRG), Ministry of Personnel, Public Grievances & Pensions and Ministry of Electronics & Information Technology (MeitY), Government of India deiwa ya krehlang waka sorkar Meghalaya dei thmu wow pyn janai yei krehkaam ka e-Governance kawa da wan chimbynta 535 ngut ki bru na ki 28 tylli ki jylla wa na ki Union Territories.

Kani man ko leh ka sien wa nyngkong wa da pynman ya kani ka Conference hapoh ka thaaiñ North East India.

Advertisement ad1

0 Comments

Leave a Reply