Da ki spah tylli yap ki dakha wa tympdung Bom uwa chim wai ya ka wah Prang

Jowai : Ka seiñ Borghat-Jaliakhola Aquatic Life Welfare Association (BJALWA) da pyntip ko wa ha kani ka sngi Bibar ka 23 tarik u wi u bru wa tip kam u Maikos Syrti na ka chnong Chiehruphi, East Jaiñtia Hills da tyngkheiñ u ya ki kyndon aiñ ka JHADC kamjooh yong ka seiñ deiwa tynyap roi u ki ki dakha deiwa tympdung bom hapoh ka um.

Ini da jia i ha ka wah Prang wei ka seiñ da li hiar ko cha kani ka wah ha ka sngi wa bood wei da chem ki da ki spah tylli ki dakha wa yap wa per ha ka wah.

Ka seiñ da pynsñiaw ko yei pyrchah ko yeiwa leh ka JHADC deiwa dai lilam ko ya ki wah cha ki bru wym tip u kheiñkor ya ka rymaw wa ya waroh wa im hapoh yong ka. U Maikos ym pu em slem yoh u chim wai ya ka wah Prang wa ka wah Pyrhung wei ini i leh u da pynsakhiat wa oo man u u bru wa kwah rahah wei ym kheiñkor u ya ki mynsien yong kiwa em ha kani ka wah.

Kamtæ ka seiñ da kyntu ko ya ka JHADC wow pynchitom ko ya u Maikos Syrti katkam ka aiñ yong ka council wei wow pyndam noh ya ka contract uni u bru wow pynemkaam u ya kini ki wah.