Advertisement ad1

Jowai: Wow pynsñiawthooh ya ki khynnah skur wa ki paidbah heiwow man kiwa da pynkhreh hawa pynjæd tympra ki bor ka Rymaw, ka tnat District Disaster Management Authority, West Jaiñtia Hills District ryngkat wa ka 1st Bn National Disaster Response Force (NDRF) Guwahati Assam ha kani ka 10 wa ka 11 tarik da pynman ki yaka Preliminary Training katwa ynne ka sngi won da pynman yaka Mock Drill Exercise ha Amwi Jarain Secondary School ya kawa da sakhi yaka da ki khynnah skur kamjooh ki paidbah ka Amlarem Civil Sub-Division.

Da sdang yaka Mock Drill deiwa pynkieh ya ki siren kam ka dak wa da khih u khmi wei ki khynnah skur kamjooh kiwa sikai da rieh ki hapoh miej wa ki ben, wei hadien won da mih ki chalait yeiwa da pynbood won deiwa chim ya ka pyrtuid wow tip kiwon ki khynnah kiwa wan skur wa ki wym em, da phah yutip cha ki tnat waphær waphær heiwa ka NDRF, Civil Defence, Fire Service wa kiwi kiwi da wan ki wow e i yarap wei wow leh yeiwa emkaam.

Advertisement ad1

Ha ka yalang wa tbian uwa kreh naka District Disaster Management Authority West Jaiñtia Hills District u Ebormi Langshiang da ong u wa kani ka sngi toh ka “International Disaster Risk Reduction Day” yow kynmo ya ki bru na kylleiñ ka pyrthai kiwa maad yei bor ka Rymaw. Da pynkynmoo u leh ya i bor pynjæd tympra ka Rymaw hapoh ka jylla deiwa ong wa u khmi bah yong u snem 1897 da ktah joor bha u ya ki paidbah ka jylla.

Da ong chooh chooh u wa i pynman ya kani ka mock drill daw yarap bha ko ya ki paidbah wow sñiawthooh wa kammon u leh ki hawa khih khmi iwa ye u jia ha iwon iwon i por.

Da ong u leh wa kam kani ka esikai daw pynman leh ha ki skur wa ki college ka District.

Ka J.U. Kharpuri kawa man leh kam ka BDO Amlarem hadien wa sakhi ko ya kani ka mock drill da ong ko wa i bor pynjæd ka rymaw ympu psiah ware i hei bor pyrkhat pyrdaiñ ki paidbah hadooh kini ki sngi leh kamtæ da kyntu ko ya waroh wow man ki kiwa da pynkhreh la heiwon iwon i thaw namo i por.

Da yooluti ko leh wa neini chakhmat daw ye u pynman ya kam kani ka esikai ka wow yohmyntoi ki khynnah kamjooh leh ki waheh.

Share this:
Share on Facebook0Tweet about this on TwitterGoogle+0
Advertisement ad1