15 49.0138 8.38624 1 1 4000 1 http://wyrta.com 300

Da pynkhreh bha ka Congress ya ki phang yaklam hapoh ka dorbar wow wan: PT Sawkmie

0 Comments

Jowai: Ka liang pyrchah ha ka yung dorbar chna-aiñ ka jylla da chut jabieñ bha ko wow rah chiboon ki phang yaklam ha kani ka dorbar wa san sngi ka wow sdang nadooh ka 21 tarik uni u bnai wei kini ki phang toh ki wow ktah ya ki paidbah ka jylla.

U chief whip ka Congress ha yung dorbar, u Process T Sawkmie u da ong u wa ka party da pynkhreh ko ya u chabuk neibynta kani ka dorbar u wow ktah ya ki phang wa yatoh wa ki paidbah nadooh kiwa rep, themmator, ka tulop kiwa sikai, wow tipnit ya ka ktien Khasi, i roi i drugs, u pood u ang ka jylla, i pynkrehkaam ya ka National Registration of Citizens (NRC), ka building by-law ka MUDA, i thmu pyndooh ya ka scheme sorkar pyrdi lyngba ka NEC wa kiwi kiwi.

“Daw yirwait i ya ki chkoor ka sorkar Meghalaya Democratic Alliance (MDA) wa yahkhmat da ka NPP kawa synchaar dang ynru bnai tam hajrong ki phang wa ktah ya ka jylla,” da ong u Sawkmie.

Hajrong ka NRC, u Sawkmie da ong u wa man ko iwa emkaam neibhah da yoo chyrkhei yei em ki bru na Bangladesh ha kani ka jylla.

Ha iwi i liang uni u heh ka Congress da ong u wa hanlada ka party em ko ha i liang pyrchah, tangwa daw kyrchaan ko ya i rai wow wanrah ka sorkar wow pynpsiah ya i ktien Khasi wa Garo ha ka riti synchaar ka ri wei lada ym man kaam, daw thooh da kiwi tawon ki luti deiwa pynrap wa waroh ki 60 MLA u yakhih pyrchah ki ya ka Parliament.

Kawi ka phang wa pynsñiaw u toh i wym pait ka sorkar yei kaam tia pood ka Meghalaya Urban Development Authority (MUDA) ya ki bru kiwa chna yung, riñ um ha ki thaw wa haap cha baar ka Shillong Municipal Board tangwa ki bru kiwa ym em ha ka SMB dang chah pyndik ki ha ki tnat sorkar kam ka PHE, MeECL, wa kiwi kiwi.

Heijooh i por u Sawkmie da ong u wa daw paan pynche leh na ka sorkar jylla, neiyi i daw wa ka sorkar pyrdi pyndooh noh ko ya ki scheme na ka North Eastern Council (NEC) nadooh u snem 2017 kiwa toh u pynkreh neibynta ki kaam pynroi ha ka thaaiñ mihsngi.

“Ka sorkar India daw pynsangeh noh ko ya waroh ki scheme lyngba ka NEC nadooh u snem 2017, wei haap thooh i yei daw”, da pynrap u Sawkmie.

Advertisement ad1

Sdang ka 2nd Division ka EJHDFA

Previous

Pynman esikai ka DBDU hajrong i rep coffee, u ....

Next

0 Comments

Leave a Reply