Jowai : Ka seiñ AJYWO Central Body da pynrem joor ko ya ki bor sorkar yong ka West Jaiñtia Hills District, hajrong ka FIR pyrchah ya ki nongyalam seiñbhalang kiwa kynthup ya ka JYF, KSU, WJNC wa ki nongyalam yong ka KNGCSU hajrong i yakhih ki khynnah puræ ka KNGCSU kiwa dawa na ka sorkar wow pynmankaam ya ki mat dawa yong ki, kiwa nei bynta i bha i miat yong ka Kiang Nangbah Government College, Jowai.

“I smat ki bor sorkar yong ka WJHD wow ujor FIR ya ki nongyalam seiñbhalang yong ka Jaiñtia Hills man ko tang wow pyrchang yong ki wow pynsuki ya ki seiñbhalang neibhah wa ki seiñbhalang yieñ ki wow klam neibyna i hok ki paidbah”, ong u President ka AJYWO Central Body u ma M H Dkhar .

U ma Dkhar da ong chooh chooh u wa, “I yakhih wa jai jai yong ki khynnah puræ ka KNGSU ym toh wow myntoi samen tangwa nei bynta i myntoi ki khynnah puræ kiwa man ka mynried ka ri wa ka jaidbru. Tangwa sñiaw lynnoh wow yoo wa ki bor sorkar ka WJHD da ujor FIR ki pyrchah kini ki khynnah kiwa hap u puræ puthi”.

Ka AJYWO kyntu ko ya ki bor  sorkar ka West Jaintia Hills District pyndam noh ya ki FIR pyrchah ya ki nongyalam ka JYF, KSU, WJNC wa ki  nongyalam ka KNGCSU wei ka seiñ dawa ko leh na ka sorkar wow pynmankaam noh ya ki mat dawa ka KNGCSU neibynta i bha i miat ki khynnah ka Kiang Nangbah Government College.

Share this:
Share on Facebook0Tweet about this on TwitterGoogle+0
Advertisement ad1