Advertisement ad1

Umlathkur : Ar bnai hadien wa wan u Principal Scientist, Central Institute of Fisheries Technology (CIST) u Dr. M.M. Prasad cha ka chnong Umlathkur yow pynyoo rong ya ki baam wa boonjait kiwa chna na ka dakha kam u achar dakha, u papor dakha, fish ball, syrwa dakha wa kiwi kiwi tawan jait wa da pynkhreh ka CIST.

Sa chisien da wan biang u wa ki kynhun u cha ka chnong Umlathkur wa ka chnong Thangbuli ha kini ki le sngi nadooh ka 16 tarik uni u bnai hadooh ka 18 tarik yow e sikai ya kamwa 60 ngut ki nong chong chnong ka Umlathkur wa ka Thangbuli yei rukom chet Fish Cutlet, Fish Ball wa i Aachar Dakha.

Advertisement ad1

Ong u Dr. Prasad wa oo ban joor u yei emkaam u pynkhreh ya kini ki baam hei rukom wa khooid wa suba deiwa bood yei stad sayan ha ki musla wa pynemkaam ha wa chet næ sdieh yow ye ki u dai deiwa ong wa ini i baam toh iwa tei yei doh yei pran ki bru.

Da pteiñ chooh chooh u deiwa ong ini i wan e sikai toh i sien wa ar hapoh ka ri wa hadooh ki tiar wa emkaam kam ki electric fryer, grinder, ice box, digital weight scale hadooh ki tari wa kiwi kiwi da e mynkna cha ki nongchong chnong kam i lad ya ki wow sdang noh ki u pynkhreh ya kini ki baam.

Yow neh slem ki mar wa pynkhreh ki deiwa song (packaging) ya ki ha ki song wa ye ki pynyieñ ha ki thaw dai wei deiwa booh ya kini ki baam ha ki deep freezer ye ki u pynneh ya ki baam hadooh le bnai khlem sih.

Hei yatoh won wei rukom syang dakharang ha kini ki chnong ong u wa daw e mynkna leh 3 tylli ki Fish Smoking Kiln næ ki toskhana syang dakha ki wa da kyrchan da ka CIST kiwa man leh kam ka stad sayan ka juk katni.

Da kini ki toskhana ong u wa ki wa syang dakha ym hap de ki u chah ya i tdem  neibhah i tdem daw ktah ko ya i chait i khiah ki bru nadooh ki lungs hadooh ki khmat u bru.

Ki 3 tylli ki toskhana mynkna wa daw e cha kani ka chnong man ki kiwa chong dor T. 25,000 u wi.

Hei yoh u yaklam wa ki kattu katni ki wa chah sikai da ong ki wa boon ki bru kani ka chnong kiwa da yoh u maad ya kini ki baam wei waroh bang bha ki ki khamtam ya i Aachar. Ong ki wa sah sa du u sdang noh ki u chet wow dai yow ye u pynpliah ya i rukom chet ya kini baam.

Ya ki tiar wow pynemkaam ha ini i pynkhreh ya kini ki baam da saam da ka SDO Civil Amlarem Sub-division ka kong B. Blah, EAC, ka kong J. Kharpuri  u BDO Amlarem Block u  B. Sungoh wa kiwi kiwi.

Ya ka yalang ynne ka sngi da pyllai da u Project Director DRDA, Jowai u D.M. Wallang.

Share this:
Share on Facebook0Tweet about this on TwitterGoogle+0
Advertisement ad1