15 49.0138 8.38624 1 0 4000 1 https://wyrta.com 300 0

Du deiwa bood ya ki kyndon ki aiñ ka ri u ye wow tih mooyong biang hapoh ka jylla: Conrad

1 Comment

Shillong: U montri rangbah ka jylla u Conrad Sangma ynne ka sngi da pyntip u haka yung dorbar wa ya i tih mooyong u chah hapoh ka jylla deiwa bood ya ki aiñ ka sorkar pyrdi katkam ka hukum wa pynmih da ka Supreme Court.

Hawa jubab yeiwa kylli u MLA samen u Syntar Klas Sunn haka kynta booh ya ki phang kylli, u Conrad da ong u wa ya i tih mooyong u chah du deiwa bood yaka aiñ Mines and Minerals (Development and regulation) Act, 1957, ka Mines Act, 1952, Coal Mines Regulation, 2017 waka Environment (Protection) Act, 1986.

U Conrad da e u i jubab wa bniah ya kiwi kiwa kylli heiyatoh wa kani ka jooh ka kaam kawa da chim lut aw jan waroh i por deiwa ong leh wa ka Supreme Court da e biang ko yei man tre ki bru ri-loom ya ki thaw ki bhaw yong ki.

U montri rangbah da ong u wa manda tih mooyong da ki bru ri-loom namo ki tre thaw deiwa yoh yaka Mining Lease naka sorkar jylla katkam ki kyndon ki aiñ ka sorkar pyrdi i khang ka NGT ym krehkaam ko.

Da pyntip u leh yaka dorbar wa ka sorkar jylla dang pynkhreh ko yaka Mining Plan wei daw phah yaka cha ka sorkar pyrdi yow yoh yei mynjur.

Hadien wa mynjur yaka Mining Plan, ka jylla daw e ko ya ki Mining Lease wei emkaam ki wow yoh saka mynjur (Clearance) naka chnat Forest and Environment kamjooh yaka Air and Water Clearance.

Lada ka thaw tih mooyong heh ko 150 Hectare daw emkaam wow yoh bor naka Union Ministry of Environment and Forest.

Chooh chooh da ong u wa ya waroh ki kyndon tih mooyong daw pynbiang ka sorkar kamjooh wow yada yaka rymaw wa ya ki bru wa tih mooyong.

Da pyntip u leh wa katni da em ki tiar ki tar nadooh ki kor, ki Robot wow tih mooyong hadooh ki thaw wa tih Rat-Hole namo ki Tunnel Mines wa da leh leh ha kiwa boon ki ri ka pyrthai.

1 Comment

  • September 12, 2019 at 2:54 am
    Angelico Sana

    Ladi ki robot u tih ia u mooiong te kitu ki bru wym em purea te Da iap chwa..

    Reply

Leave a Reply