Jowai: Ka Canara Bank kawa em ha Ladthalaboh ynne ka sngi da sam scholarship ko cha 6 ngut ki khynnah kynthai na le tylli ki skur hapoh ka skhim iong kani ka bank kawa tip kaam ka ‘Canara Vidya Jyoti Scheme’ kawa thmu u iarap poisa chisien chisnem ia ki khynnah kynthai kiwa wan na ki yung wa dooh wa duk (BPL Families) kamjooh leh kiwa man kaam ki SC/ST.

Da jied ha kani ka kynti ia ki khynnah na ka skur Police Public Secondary School, Ladthadlaboh UP School wa na ka Amwi Higher Secondary School. Ia kini ki skur da khana u Branch Manager ka bank u ma Larilang Shabong da jied ia ki kaam chiwynta ka Corporate Social Responsibility (CSR) programme iwa mut i kamram iong ka bank u kyrchan wei u iarap ia ki chnong wa ka bank krehkam ko.

Advertisement ad1

Kani ka scholarship toh ia ki khynnah kynthai wa puræ nadooh klas 5 hadooh klas 10 donhi. Ia ki klas 5 hadooh 7 da ioh ki T. 2,500 ia ki klas 8 hadooh 10 won da e T. 5,000. Ia kini ki khynnah da jied da ki skur iong ki neidaw kini ki khynnah maan ki kiwa minot ha i puræ puthi wei kiwa emkaam iarap poisa.

Ha kani ka sngi na ka skur Police Public Secondary School da ioh ia kani ka scholarship da ka Lahunbiang Suchiang kawa dang puræ klas 5 wa ka Regina Pajuh klas 6.

Na ka Ladthalaboh UP School da ioh da ka Nitero Sayoo klas 7 wa ka Winika Langstang klas 8.

Katwa na ka Amwi Higher Secondary School Jowai da ioh da ka Rilang Dhar klas 9 wa ka Balemon Liting class 10.

U ma H.H. Mohrmen uwa man kam u kongsan ha kani ka sngi da snein u ia ki khynnah iow pynemkam ia kani ka poisa deiwa ye ki u ioh iarap ha ka puræ puthi iong iong ki lane u thap ka hapoh ka bank account iongki ymtoh u pynlut ka deiwa thied da ki phone lane kiwi ki tiar wa ka-it ki khynnah khynroo khyllood katni u pynemkam. Da pynchlur u leh ia waroh ki khynnah kythai u ialeh ki u poi cha ki kyrdan wa wanrah ia i burom ia ki kynthai waroh.

Ia kani ka sam scholarship ynne ka sngi da pynman hapoh kamra skur iong ka Ladthalaboh Upper Primary School.

Share this:
Share on Facebook0Tweet about this on TwitterGoogle+0
Advertisement ad1