15 49.0138 8.38624 1 1 4000 1 http://wyrta.com 300 0

Kyrchaan pura ka AKHAF yei dawa ILP ha ka jylla

0 Comments

Shillong: Ka All Khasi Hills Achik Federation (AKHAF) ha ka yalang wa nyngkong yong ka ha nongbah Shillong da rai ko wow kyrchaan pura yei dawa pynkrehkaam ya ka Inner Line Permit (ILP) ha ka jylla wa kiwi ki kaam pynroi ha ki thaaiñ nongkyndong.

Hadien ka yalang u General Secretary ka AKHAF, u John D Sangma da ong u wa emkaam yei yatylli ki seiñbhalang waroh wow pynbor ya ka sorkar wow pynman aiñ ya ka ILP ha kani ka jylla neibynta wow yada ya ki jaitbru ri-loom.

Da ong u wa ka AKHAF kwah ko wa ka sorkar u klam che ko hajrong ini i dawa neibhah hadooh katni u Montri Rangbah u Conrad K Sangma wa u Symbood Montri Rangbah u Prestone Tynsong klam ki jar jiar hajrong kani ka kaam.

Hajrong i thmu ka sorkar wow wanrah da ka khyrdop (Entry & Exit) wow kynreh baar jylla, da ong u wa ini ym yarap i nei wan psiah ki baar jylla.

Heijooh i por u John da ong u wa ya ka AKHAF da seiñ ha ka 30 tarik u Wisu dei thmu wow wanrah yei yatylli hapyrdi ki jaitbru Khasi-Jaintia wa Garo khamtam hajrong ki mat wa ktah ya kini ki jaitbru.

Hajrong ka phang i dawa jylla Garoland u General Secretary ka AKHAF da ong u wa kiwa dawa jylla ym em phyllu yumut ki wa ki Garo wa chong wa sah sah ha Khasi Hills hajrong kani ka bynta.

U John da ong u wa i dawa jylla ya ki Garo ym ktah ko neibhah da em bait ki ha Khasi Hills ka thaw wa da kha ya ki.

Chooh chooh da ong u wa lada em i yasyllok lang hadien habood neiliang ka seiñ daw chong pyrkhat ko yeini chwa wow chim ya ka rai.

Advertisement ad1

0 Comments

Leave a Reply