15 49.0138 8.38624 1 0 4000 1 https://wyrta.com 300 0

Le ngut kiwa na Nigeria yoh kem ki pulit ka WJH na Pdengshakap

0 Comments
Advertisement ad1

Jowai: Hadien wa chah kem ki baar ri (Africa) ha ki pulit ka East Jaiñtia Hills District, ha kani ka kynti won ki pulit ka West Jaiñtia ynne i step synyaaw da yoh kem ki ya le ngut ki baar ri kiwa wan psiah tooh chapoh ka ri na ri Bangladesh.

U SP ka WJH, u Lakador Syiem ynne ka sngi hawa yaklam wa kiwa pathai khubor ha kamra krehkaam yong oo da pyntip u wa ynnin ka sngi manda yoh yutip wa daw em ki baar ri wow psiah chapoh district na Bangladesh da phah ya ki pulit hapoh i yahkhmat u Donkupar Moksha, Dy. Superintendent of Police (Traffic) wow sonteri wei wow yang khap ya kam kitæ ki baar ri ha thaaiñ Amlarem.

Da pyntip u wa ynne i step synyaw heipor 1:00 da yoh kem ya le ngut ki bru na ri Nigeria wa kynthup ya u Chukwuma Celestine Okwuwa (34 snem), u Lucky Osas Enebi (36 snem) wa u Ndubuisi Moses Chime (28 snem) na Pdengshakap kamwa 10 Km na Amlarem.

Manda takit ya ki, kini ki le ngut da pyntip ki wa da mih ki na Lagos, Nigeria ha ka 6 tarik uni u bnai wei da lai lyngba ki na Istanbul, Turkey ha ka 7 tarik wow poi ha Dhaka ha i step ka 8 tarik. Heipor wa em ki ha Istanbul, da yachem ki ya uwi tawobn u bru na Nigerian hapoh ka lieñsuiñ wei chirup (4 ngut) da wan ki  cha Dhaka wei manda poi ki ha Dhaka da yakhlaad luti noh ki. 

Kini ki le ngut na Nigeria da yachem ki wa uwi u bru Bangladesh uwa da yah luti ya ki hadooh wa poi ha khappood ka ri India wei da psiah ki chapoh ka ri khlem em wa yoo lyngba ka thaw wa chrah wa sieh ha ki thaaiñ Muktapur. 

U Lakador da pyntip u wa manda psiah ki chapoh India da yachem ki wa ki 4 ngut ki bru na Muktapur wei da paan yarap ki na ki wow kit ya ki cha sor wei heipor wa dang kit ya ki da ka kari Chevrolet (Spark) wa em ya u No. ML 05 G 4952 ki pulit da ksoh ki ya kani ka kari ha Pdengshakap hadien wa lai luti ki kamwa 45 minit dei thmu wow lai cha Shillong-Guwahati.

Kini ki le ngut da rah ki du ya ki Passport wa ka VISA ka Bangladesh wei da kam ki wa wan ki chapoh India wow thoohlaad wow khayi that wei manda kynreh ya ki yusong kini ki le ngut ym em u chem iwon iwon i tiar wa man pyrchah aiñ na ki.

Neiliang ki pulit da kem ki leh ya kini ki 4 ngut wa yarap ya ki wei kini kynthup ki ya u Ronaldo Syndai (21 snem) na Syndai Kmaishnong, u Ni Pohleng (20 snem) na Syndai Lyngkot, u Kliar Mon Pohthmi (18 snem) na Syndai Kmaishnong wa u Rihok Chyrmang (28 snem) na Syndai Kmaishnong. 

U Lakador da pyntip u wa kini ki soo ngut da soohbuit ki chwa ki wa ki bru na Bangladesh wow yarap ya kini ki le ngut wow psiah chapoh India. 

Hawa kylli wa lada kini ki 3 ngut em yatoh ki wa ki 17 ngut wa da yoh kem da ki pulit ka East Jaiñtia, neiliang u Lakador da ong u wa ymye u ong iwon iwon hajrong ini neibhah ka takit dang lai ko chakhmat. 

Heiyatoh wa ini ki pulit dang pynman ki yei takit wei da pynngat ya ki hapoh ka kyndon 14(a)l(c) yong ka Foreigners Act wei ya kini waroh da wanrah hakhmat ka yungbichaar heiwa da paan wow kset ya ki hapoh ka Police Custody wow pynman chooh ya i takit.

Chooh chooh u Lakador da kyntu u ya ki bor ki chnong wa ki VDP wow man ki kiwa paitsiar wei wow pyntip wut-wut cha ki pulit lada chem ki iwon iwon iwa phylla khamtam ha kini ki por neibhah wa kani man ko ka kaam kawa yatoh wa i chongsuk ym du yong ka jylla tangwa yong ka ri hi waroh kawi. 

0 Comments

Leave a Reply