15 49.0138 8.38624 1 1 4000 1 http://wyrta.com 300

Lehkmen dap 25 snem ka Umkiang Village Lower Primary School

0 Comments
Advertisement ad1
Advertisement ad1

Jowai: Ka Umkiang Village Lower Primary School ynne ka sngi da lehkmen ko ya i dap 25 snem namo ka “Silver Jubilee” yong ka skur kawa da seiñ nadooh ka snem 1993 da ki kattu katni ngut ki waheh wa sian kiwa da yoo yei dawa wow em ka skur hapoh ka dong wow pynsuk ya ki khynnah wa lai skur na ka dong.

Ya kani ka lehkmen da wan wai pynhær lama da u Montri wa pait yaka chnat puræ puthi ka sorkar jylla u Lahkmen Rymbui hei emlang u MLA ka thaaiñ u Shitlang Pale, u MDC ka thaaiñ u Desceous Pohshna kiwa yahkhmat ka chnong, ki dkhot ka SMC nalor ki paidbah kiwa sikai wa ki khynnah skur ha ka yalang kawa pynman ha pchem ka skur kawa em ha ka Dong Par Umkiang, EJH.

Advertisement ad1
Advertisement ad1
Advertisement ad1

Wow seiñ ya ki skur ym man i iwa suk, da ong u Lahkmen Rymbui tangwa i ye ka chnong Umkiang wow seiñ ya ka Lower Primary School wow ku ko wei wow poi ko cha u moomær wa 25 snem pynoo ko yei stat wei chemphang kiwa pynlai ya kani ka skur.

Kamtæ da kyntu u ya ki khynnah skur wow pyndep skur ki ym du wow pyndep yei puræ puthi wei i stat wow neh wow tei ya i eukom im yong ki ha sla pyrthai.

Kajiak chaphang ka UVLPS, chwa u snem 1993 da em du soo tylli ki LP School wa kawi ka ME School ha chnong wei em ki leh cha jngai ka dong Pahar Umkiang wei ki khynnah haap ki wow lai kjat jngai wow poi cha skur.

Tangwa hapoh i yahkhmat u (L) Elias Pala wa u Welly Pohshna wa ki le ngut da sñiaw ki wa emkaam wow em ka skur hapoh ka dong, kamtæ da lai yaklam ki wa ka Kolliny Sutnga wow man kawa sikai ha ka skur deiwa su du T. 200 chi bnai.

Ha u jooh u snem 1993 hapoh i yakhmat ki rangbah dong da yoh yaka hukum na ka Adult Education wa da phah yaka Kolliny Sutnga wow yoh ya ka esikai chi bnai ha Jowai.

Ha u snem 1995 lyngba i yarap yong u MDC (L) H. Braveman Mukhim wa u Obil Kyndait ka sorkar da e yarap poisa (Grant) ya kani ka skur cha ka Non-Goverment wei ha u snem 2008 da pynku kyrdan ya ka cha ka Upper Primary lyngba ka SSA.

Heiyatoh wa ka yung skur hawa sdang chna yaka yung skur da i bor yong ka Dong wa ka Managing Committee kawa dang du da ki dieñ wa u phlang wow chna kamra Class. Tangwa katwa dang lai ki por lyngba i kreh chitom da ye wow pynmih poisa wa dei yarap ka sorkar katni ka skur da em ko ynru tylli ki kamra puræ.

Hawa sdang ya ka skur ki Class em ki du artylli wa kynthup yaka Class-A wa Class A-Heh tangwa hadooh uni u snem da em hadooh Class IV wa ynru tylli ki kamra puræ.

Hawa sdang da em du 25 ngut ki khynnah wa kynthup 11 ngut ki chynrang wa 14 ngut ki kynthai tangwa ha uni u snem ki khynnah da em ki 198 ngut wa kynthup ya 105 ngut ki khynnah kynthai wa 93 ngut ki khynnah chynrang.

 

Ham kheiñ kom ya ka PDF, ha ka MLA da yoh ko h....

Previous

Maham u DC ka WJH ya kiwa kamai kari kiwa chim....

Next

0 Comments

Leave a Reply