Advertisement ad1

Khliehriat: “I daw wa sdang ya ka Campaign For Change (CFC) toh wow thooh ki laad wa kammon u wanrah yei kylla wei kani ymtoh ka rynsan wow yalap Election” da ong u Jonah Kharir, General Secretary ka CFC heipor wa klam maitphang ha ka yalang wa da pynman ynne ka sngi ha Community Hall ka Khliehriat West, East Jaiñtia Hills.

Advertisement ad1

Kani ka yalang yalap wow pynsñiawthooh ya ki paidbah wa i bor chong i ha ki wow wanrah yei kylla da dep pynman leh ya ka ha kani ka 20 tarik uni u bnai ha Iawmusiang Jowai. Ya kani ka yalang ynne da pyllai da u B. Pala.

U H. Dkhar hei klam yong oo ha kani ka yalang “ha NEIGRIHMS ileh ka quota neibynta ka Arunachal Pradesh toh 8 tylli katwa ka Meghalaya kawa man ka tre jylla won yoh ko du 5 tylli donhi, iwa emkaam wow pyrkhat i wa neiyi i daw wa man kamni?”

U O. Kyndait uwa jooh man kam u MLA wa kam u CEM ka JHADC hei klam da ong u wa i thmu ka sorkar jylla wow pynkrehkaam ya ki aiñ wow chimkti ya u mooyong wei wow tih noh ya uni u mar da ka MMDC daw ktah joor ko ya ki paidbah kiwa man ki tre ri kani ka jylla.

“Lada pynkreh da ka MMDC wow tih ya u mooyong, i daw man broo i pyn ha ka ri ka yong i” da ong u Kyndait.

U Milon Warjri uwa man kam u Chairman ka CFC da ong u wa i daw wa sdang ya ka Campaign toh neidaw wym yechah de ki khynroo khyllood yeiwa chah iehbeiñ chah ieh khonswet ki ha waroh kawi ka jylla ha ka sorkar.

“Ka sorkar pynlut ko da ki hajar klur ha ki lympung pynwyrngia kam ki Festival wa ha rukom, tæ iyi wow jia lada pynlut ko ya kani ka poisa ya kiwa rep, u yarap ya ki khynroo wa seiñ khih”, da ong u Milon wei da kyntu u ya ki paidbah wow man ki kiwa bichaar bniah heipor wa jied ya kiwa mihkhmat ki wow mih neibynta yong ki.

U Latiplang Kharkongor, MDC ka Nongthymmai, da ong u wa da ki phaw snem wa da yoh ya ka jylla Meghalaya tangwa hadoh katni tang u pood u ang leh ymtoh uwa da biang, tæ hawa kamtæ yeiyi u pynbaad lada chah beh namo yut ki Khasi Pnar na ki chnong wa chong wa sah ki.

U CEM ka KHADC, u PN Syiem hei klam da ong u wa lada ha sor Shillong ki paidbah chem ki ya i eh tæ katwon tam ha ki nongkyndong.

Da kylli u leh wa lada ha waroh ka India yoh ki u tih mooyong, tæ neiyi i daw wa khang ha jylla Meghalaya, ymtoh wa tlot kiwa mihkhmat mo neibhah toh i kaamram yong ki wow chna ya ki aiñ wa ki policy kamjooh leh toh i kaamram yong ki wow yasaaid neibynta i hok yong i.

“Emkaam i ya kiwa mihkhmat kiwa tip ya ka aiñ kiwa tip u puræ kot, neibhah kamwa yoo i katni ha Jaiñtia Hills da khang yei tih mooyong toh neidaw wa hadooh katni kiwa mihkhmat yong i ympu em u chna ki ya ki policy krehkaam yong ka sorkar” da ong u Syiem.

Da kylli u wa lada em mo kiwa mihkhmat na Jaiñtia Hills kiwa bien u yasaaid neibynta ki paidbah ha ka Assembly? Ini toh neidaw wa waroh kini pyrkhat ki du neidaw yong ki hi.

Da kyntu u ya ki paidbah wow jied ki ya u bru uwa ye wow kreh khnang wa ka mynried mankawi u man ko kawa tyrchaaiñ yow lait u man ki bru wa silet.

Share this:
Share on Facebook0Tweet about this on TwitterGoogle+0
Advertisement ad1