Advertisement ad1

Shillong: Ka dhab yong ki seiñbhalang waphær waphær wa kynthup na Khasi Jaiñtia wa Garo Hills, ryngkat wa ki khlieh synchaar, ka synjuk kiwa synchaar chnong, ynne ka sngi da pynmih ki sa kawi ka dhab ki seiñ wa tip kam ka Meghalaya Indigenous Tribal Constitutional Rights Movement (MITCRM).

Ini i pynmih ya kani ka dhab toh hei thmu wow pait ya i thmu ka sorkar India wow pynkylla ya ka dkhot wa ynru (Sixth Schedule) yong ka riti synchaar ka Ri.

Advertisement ad1

Hawa yaklam wa kiwi pathai khubor hadien wa kut ka yalang ha yungkrehkaam ka KSU ha Jaiaw, heiwa u Chairman ka NESO, u Samuel Jyrwa da ong u wa em ka Bill yong ka sorkar India kawa da pynmih ha u snem 2015 kawa thmu wow pynkylla, ya ki kattu katni ki kyndon wa ka Sorkar thmu ko wow pynkylla ya ka kiwa ye u wanrah i ma ya ka jaitbru khian paaid ka jylla.

Da khana u wa i thmu wow pynkylla ya ki kyndon hapoh ka Sixth Schedule da wan na ka Ministry of Home Affairs (MHA) wei da pynsñiaw wa neiliang ka MITCRM daw phah ko da ka dorkhat cha u Montri Rangbah dooh, u Narendra Modi, cha ka tnat Ministry of Home Affairs, ki MP yong ki jylla ka thaiñ mihsngi neibhah ya ini i pynkylla daw yañia ha ka yungdorbar wow wan ha Parliament. Da ong u leh wa ka Sorkar India toh wow ap ko yeiwa dawa ki tre ri khamtam ka thaiñ mihsngi.

U Chairman ka NESO da ong u wa em boon tylli ki kyndon, tangwa wa ar tylli ki kyndon kiwa ka sorkar ka thmu ko wow pynkylla kiwa ktah ya ka jylla toh i thmu wa hadien chi snem em ki Autonomous District Council (ADC) toh u thung noh ya ki Village Council wa ki Municipal Council. Lada wanrah ya ka Village Council wa ka Municipal Council, ki Dorbar Chnong daw chah pyndooh noh neidaw ya ki kaam chnong daw pyllai noh da ki Village Council.

Sa iwi won i thmu toh wow e noh ya ka pyllai Election yong ki ADC cha ka State Election Commission i wow ktah ya i hok yong ki khian paaid wa em ha ka jylla. Da ong u leh lada wanrah ya ki tai ki mat wow pynkylla, kiwi ki jaitbru leh ye ki wow yakhun ha ki Election cha ki ADC, ka wow tynyap yei bor ka Sixth Schedule hapoh ka jylla.

Ha iwi tawan i liang u Erwin Sutnga, uwa man leh kam u muktiar uwa man leh u dkhot yong kani ka seiñ da ong u wa toh wow e yumut ka sorkar India wow pynyaphær noh ya i rukom pynkrehkaam ya ka Sixth Schedule hapyrdi ki jylla waka sorkar pyrdi wei wow booh da ka “Seperate Chapter”, neibhah wa i rukom im, ki riti ki dustur, ka rukom synchaar wa i rukom kheiñ jait yaphær i lada wyrchaw wa kiwi kiwa leh ki jylla wa haap hapoh ka Sixth Schedule.

Da ong chooh chooh u leh wa i e yumut yong ka National Comission on Scheduled Tribes 2012 wa emkaam wow pynpsiah ya ka Tribal Rights ha ka Sixth Schedule ka sorkar toh u leh ko ya ini.

“I ym ye i u pdiang ya ini i thmu yong ka sorkar wow pynkylla neibhah ym em yumut ko iyi iyi leh wow booh ya ka Sixth Schedule hapoh ka jylla wei ini i pynkylla daw wanrah ko yei ktah ya i kiwa khian paaid” da ong u Erwin.

Share this:
Share on Facebook0Tweet about this on TwitterGoogle+0
Advertisement ad1
Advertisement ad1