Advertisement ad1

Jowai : Ynne ka sngi 12 tarik u lat ka jylla u V. Shanmuganathan da wan wan hiar u cha ka dong Loomyongkjam yow emlang ha i lehkmen pynkut dap 75 snem kawa da sdang nadooh u ka 15 Wisu uni u snem.

Ha chwa kani ka sngi kam ka dong ka Loomiongkjam da ye ko u pyndep boon ki yalehke hapoh ka dong kam ka Quiz, Debate, Miss & Prince Loomiongkjam, yakop Siatkhnam, Dat Mooniaw, Drawing, Essay wa kiwi kiwi.

Advertisement ad1

Ha kani ka sngi pynhiar pyrda ya ka yalang da pyllai da u Dr. I. Kjam heiwa da yoh yei klam na u Waheh Chnong u ma Mariphang Challam, i chad tynre na ka Youth Committee, i pyllait paidbah ya ka kot sahkynmoo næ ka souvenir da u lat kamjooh da wai u leh ya u moo sahkynmoo.

U lat hei klam yong oo da pynkynmoo u ya ki paidbah wa hadooh katwoon man ki wa da yoh i kyrkhu neibhah ha ki jait bru yong i ym em wa khrong, wa yap thngan kamjooh leh ki kynthai man ki wa yoh yei burom wei ki wa em kyrdan ha i imlang sahlang. Da e nuksa u ya u wi u bru wa chem u ha Tamil Nadu wa da dooh ya le ngut ki khon kynthai neidaw wa ym ye u pa ki u su dowry yow yoh bia ki.

Sniawsih u yo leh wa boon ki manbei yong i da chah eh ki ha u pa wei da hap psa khon ki samen samen, kamjooh ong u da yoo u boon ki khynnah khynnah khynroo ki wa uiñ cha wah cha neiñ ki wa khlem kreh. Kamtæ da ong wa ki thong yong ka chnong ka thaw toh u pyndooh noh ya kini waroh wei u mang i u man ki wa biang ki thaw puræ puthi ki hospital wei u man ki chnong ki thaw yong i kiwa khooid wa suba.

Da kular u leh wa u yarap u katwa ye hei yatoh wa ka memorandum wa da e cha oo da ka kong Wanlana Challam yow yarap poisa u chna ya ka yung skur yow ye u pynku ya ka cha ka kyrdan Higher Secondary.

Kamwa man kattæ ka skur Pohmusiang Loomiongkjam em ko hadooh ka kyrdad Upper Primary donhi.

Ha kani ka sngi leh da pynemburom ya ka Clarissa Challam kawa man ka kynthai wa nyngkong dooh na ri-loom Jaintia wa da yoh ya ka kyrdan Scientist. Ka Clasrissa da yoh ko ya i nam Scientist ARS, Agriculture Biotechnology na ka ICAR ha u bnai Khonchonglad ha u snem wa dep deiwa pyndep ko ya ka eksam ka tip kam kam Agriculture Research Service.

Ka Clarissa da pyndep ko ya ka BSC na ka Nagaland University, ya ka MSC na ka College of Post-graduation, Umiam, ya ka PhD dang leh ko na Coimbatore Agriculture University na Tamil Nadu.

Da pynkut ya ka yalang deiwa pynhiar u lat ya ka lama lehkmen 75 snem.

Kiwa wa emlang ha kani ka yalang toh u ma T. Shiwat CEM, JHADC, u ma A. Shullai, Deputy CEM, u DC wa u SP ka West Jaintia Hills wa kiwi ki dkhot ka dong.

Share this:
Share on Facebook0Tweet about this on TwitterGoogle+0
Advertisement ad1