15 49.0138 8.38624 1 0 4000 1 https://wyrta.com 300 0

Sdang i e dawai wieh ha WJH

0 Comments
Advertisement ad1

Jowai: Ka yung krehkaam u District Medical and Health Officer, West Jaintia Hills ynne ka sngi da sdang ki ya ka National Deworming Day ha Government Boys Higher Secondary School, Jowai, kawa man kam chibynta i yaleh ka Ministry of Health and Family Welfare, Government of India kawa sdang nadooh u snem 2015, yow e dawai wieh ya waroh ki khynnah hapoh ka ri wei da saam mynkna ya ki dawai wieh cha ki khynnah waroh.

Ka Dr. E. Challam, Additional District Medical & Health Officer ha i ktien waiphang yong ka da ong ko i thmu wa kongsan dooh ka National Deworming Day toh wow pynlait ya ki khynnah neiwa em wieh ki. Katkam wa ong ka World Health Organisation, ka ri India man ko kawai na ki ri wa boon i em wieh ki bru kawa poor na i khyndaw wa em u wieh wa tip kam u Helminths Parasite Worms wei lada em u ha ki khynnah daw ktah ko ya i heh i san ki khynnah kamjooh ya ka chait ka khiah yong ki.

Advertisement ad1

Da pyntip ko leh wa ki khynnah wa em 1-2 snem i rta toh u e ya ki chiteiñ i dawai kuli wa tip kam i Albendazole (400 mg) wei ya kiwa em 2 snem chaneiñ toh u ngooid namo deiwa kjap ya iwi ini i dawai kuli, ya ini ye u leh hapoh i pait kiwa sikai skur, ha ki Anganwadi Centres hapoh i pait kiwa kreh kam ki Anganwadi wei ye leh u lai bait cha ki Anganwadi Centre lada ym yoh ya ini i dawai ha ki skur.

Da ong ko leh wa nalor i dawai emkaam wow man kiwa leh khooid deiwa sait bha ya ki kti chwa wow bam, hadien wa wan paikhana, u sait bha ya ki jhoor wa ki soh chwa wow baam.

Da pyntip ko leh wa ini i dawai wieh toh iwa da e mynkna cha ki skur wa cha ki Anganwadi Centres wei u pteiñ u leh ya ini hadooh ka 30 tarik uni u bnai yow pyntikna kiwa ym em yoh dawai ynne ka sngi daw yohlaad ki wow dih ya ini i dawai.

Ka Dr. D M Blah, Deputy Director, DHS, Shillong, ka D. Khongiong, Joint Director of School Education and Literacy, Dr. (Mrs) L M. Darnei, District Mission Coordinator, SSA-SEMAM, Jowai, U Dr. A.C. Ajar Chyne, District Medical & Health Officer, Jowai kiwa sikai, ki doctor wa kiwi kiwa kreh naka chnat i chait i khiah da emlang ki ynne ka sngi.

Da yoh ya ki ktien pdiang sñiawbha na u P. Passah, Principal Government Boys Higher Secondary, Jowai katwa u MK Augustine Iano, District Coordinator, West Jaintia Hills da u ya ki ktien e khublei. 

0 Comments

Leave a Reply