15 49.0138 8.38624 1 1 4000 1 http://wyrta.com 300 0

Sñiawkhia ka HYC yei sdang taroi ki thaw uiñke suwari ha Mawthadraishan

0 Comments

Jowai: Ka Mawthadraishan kawa haap ha West Khasi Hills District man ko kawi naki thaaiñ yong ka West Khasi kawa boon ki thaw lai uiñke suwari wa kynthup yaka Mawphanlur, Wah Kynshi, Lum Mawthadraishan, Markham, Mawhiang wa kiwi kiwi, deiwa em yong kini ki thaw wa pawnaam da sdang yarap ko ya kiwa chong chnong ka thaaiñ Mawthadraishan ha kini ki sngi wa katni, da em leh ki thaw wa da em leh ka yoh nong wei lada sumaar sukher yaki soodong sookun yong kini ki thaw daw yarap ko wow pynku chooh chooh ya ka kaam uiñke suwari.

Kamtæ ka HYC Mawthadraishan Circle ka khut sñiawbha ko ya waroh wow wan cha ka thaaiñ Mawthadraishan wei da em leh ka maham ya kiwa wan uiñke wa ym toh u noh roi yaki Plastic nadooh ki yusong Chips, ki klong, ki baam wa ki jait dih pynmuaid ki wow pynsih dur ya i miat ka rymaw ha Mawthadraishan ym du ha kini ki thaw kamjooh cha rood sarok deiwa kyrpaad leh wow yada yaka bei rymaw wa miat ha kani ka thaaiñ Mawthadraishan wa ha West Khasi Hills District leh kamjooh.

Kini ki thaw uiñke suwari ha Mawthadraishan em ki leh ya ki parom kiwa chong yurim wei emkaam wow sumaar ya ki neibhah, ka Mawphanlur wa naki tre loom yong ka pynmih ko ya ki um baam um dih wa psa um ya palat 30 tylli ki chnong na Markasa wa ki thaaiñ yong ka, ka Wah Kynshi won kawa e baam e dih yaki paidbah chong chnong kiwa im deiwa tong doh yow yoh dai haki yaw khnang wow yoh psa ha yung.

U Lum Mawthadraishan man u uwi naki lum wa bna naam ha Ri Ynñiawtrep wei na uni u lum kiwa uiñke suwari jooh wan bha ki ha ki por tlang wa ha i step ye ki wow chynna ya ki loom Himalaya wei da i sumaar ka chnong Lawdisai uni u loom man u uwa miat wei uwa khooid.

Kamtæ ka HYC Mawthadraishan Circle da kyrpaad deiwa burom sbun ya kiwa wan uiñke suwari wow sñiawbha wow kiar na i pyntaroi ya kini ki thaw neibhah i miat ka rymaw ha Mawthadraishan chong ko ha phi wei kiwa chong chnong kani ka thaaiñ toh ki warep kiwa smat wow sumaar khooid ya kini ki thaw tangwa nadooh wa sdang pawnaam kini ki thaw da sdang boon ki plastic chips, ki klong plastic wa ki klong kiad wa da chah tympiah, kam ka seiñ sñiawkhia ko ya kam kini ki rukom leh bru khloo kiwa wan paitke kiwa pynsih dur yei man kyntang yong ki loom ki wah, neitæ i daw wa kyntu ya waroh wow sumaar lang yaki soodong sookun yong kani ka thaaiñ wei lada chem ya kiwa pyntaroi, ka seiñ da dep pynbait ko wa ki sordar chnong wa ki aiñ chnong wow pynchitom da iwa eh.

Ini toh katkam ka khubor na u Phondar Sohshang, Socio & Cultural Secretary HYC Mawthadraishan Circle.

Photos: Contributed

Advertisement ad1

0 Comments

Leave a Reply