15 49.0138 8.38624 1 1 4000 1 http://wyrta.com 300

U ieh noh u MM Danggo ya ka kaam MLA na Ranikor hadien wa wai ya ka Civil Sub-Division

0 Comments

Mawkyrwat: Mar ya dep kular wow pynku kyrdan noh ya ka Ranikor Administrative Unit cha ka Ranikor Civil Sub-Division, kiwa kitkaam wa kiwa kyrchaan wa ha khmat ka seiñ Congress ynne ka sngi da khylliap noh ko ya ka lama Congress wei da pynbna wa ym em Congress de ha Ranikor Constituency wei daw psiah noh ki cha ka National People’s Party (NPP).

U Conrad K Sangma, montri rangbah ka sorkar jylla da pynbna u wow pynku kyrdan noh ya ka Administrative Unit ha Ranikor cha ka Civil Sub-Division ynne ka sngi ha ka yalang paidbah wa pynman ha Ranikor. Ini i pynbna man ko kam wow pynhun yei dawa Ranikor Civil Sub-Division Demand Committee, South West Khasi Hills District nadooh u snem 2007.

Ka Committee da pynsñiaw ko yei kmen wa khroo wa ki paidbah na ki 65 tylli ki chnong ka Ranikor Constituency.

Kiwa kitkaam ka Congress hapoh i yahkhmat u Jerman Nongsiang (uwa pynlai ya ka yalang), uwa man leh u President ka Ranikor Block Congress Committee, u Kitborlang Nongrem u President ka South West Khasi Hills District Congress Committee (uwa man leh kam u Chairman ka Ranikor Civil Sub-Division Demand Committee) hei emlang u Nelbi T Sangma, General Secretary ka Ranikor BCC, da paan ki yei mynjur na ki paidbah deiwa booddien leh ya ka rai ka yalang ka Ranikor BCC kawa man ha Rangthong ha ka 8 tarik uni u bnai.

Da kyntu ki leh ya u MLA wa da pynjop ki wow pyrkhat bha u wei wow iehnoh ya ka kaam MLA hapoh ki 7 sngi wei da pyntip ki leh wa kiwa yahkhmat ka Congress u psiah noh ki cha ka NPP wei da ong ki wa da pynjop ki ya u MLA ka Ranikor u Martin M Danggo la soo sien naka Congress kawa em hei synchaar tangwa da mylliñ ko ya ka Constituency wei da klam ki leh ha ka ktien Garo wa Khasi.

Da pyntip ki leh wa dadep yachem ki wa u montri rangbah ka jylla ha ka 25 tarik u bnai wa dadep yow pynsñiaw yei kwah ki ya ka Ranikor Civil Sub-Division wei ym em poi pyrkhat i wa daw man sakhiat ko.

Hadien ini u President ka Ranikor BCC u Jerman Nongsiang da khut u ya u Working President ka NPP Meghalaya u Dr. WR Kharlukhi wow pyndooh ya i krehkaam NPP Block Committee Ranikor Constituency warim nachwa wa kini kiwa kitkaam Congress u chna noh ki da ka NPP Block Committee Ranikor Constituency kawa thymme.

“Ha u snem 1897 ha ka 12 tarik da khih u khmi wa joor bha ha ri-loom Khasi-Jaiñtia wei ynne ka sngi da khih u khmi ka kaam saiñ pyrthai ha Ranikor”, da ong u Martin M Danggo. “Ki paidbah da chah chitom lang ki wa nga neibhah ym jooh em yoh i iyi iyi. Nga ong O wa lada ym yoh chuki montri leh ym phær tangwa ki paidbah ka Constituency yong nga ymtoh u chitom ki wei maad ki yei chitom. Nga kynmmoo wa kutwa wan u (T) PA Sangma wow pait ya ka Ranikor nga da kdaw bait O yei chah iehbeiñ kani ka thaiñ,” da ong chooh chooh u.

Da ong u leh wa haap u wow bood ya ka sur ki paidbah wa kyrchaan wa kiwa kitkaam wow ieh noh u kam u MLA wei u ieh u leh ha ka sngi wa booh mooyurim ya ka Ranikor Civil Sub-Division.

U Prestone Tynsong, symbood montri rangbah ka jylla hei klam yong oo da ong u wa nadooh u snem 2003 hadooh u snem 2008 u Danggo boonkaam u wow booh dorkhat wow yoh Civil Sub-Division wei da yoo leh wa em i hok wow yoh Civil Sub-Division ka Ranikor kawa em leh ha khappood wa ka ri Bangladesh.

U montri rangbah ka jylla, u Conrad K Sangma hei klam yong oo da ong u, “Ka sorkar MDA toh neibynta u paidbah wa ka yong ki paidbah wei i em i ka thong wow kreh neibynta ki paidbah. I kaam hi ym man ko kawa suk tangwa ki tnat krehkaam ka sorkar daw thooh bniah ko wow pynkhreh wow chna ya ka Civil Sub-Division. U sdang chwa deiwa booh ya yungkrehkaam wa chipor wow pynlai chakhmat ya i krehkaam ka Civil Sub-Division wei ya ka tarik wow booh mooyurim daw ekti ha u Martin Danggo”.

Hawa yaklam wa kiwa pathai khubor hadien wa kut ka yalang u Conrad Sangma da ong u wa ka tarik wow wai ya ka ym slem de ko neibhah wa da yoo yei sahdien wei chah iehbeiñ ka thaiñ waroh chi kattu ha kiwa boon ki liang.

“Hadooh kattæ ympu ye u ong katwon daw mang poisa wow chna ya ka Civil Sub Division tangwa daw chim i yei yakrehlang yong waroh ki sahep wa ki tnat sorkar wow pait bniah hajrong ini” da ong u Conrad deiwa pynrap wa toh i kaamram yong ka sorkar wow leh iwon iwon neibynta ki paidbah wei yeini da pynbood won sa i saiñ-pyrthai.

Kiwi kiwa da wan cha kani ka yalang ynne ka sngi toh u James K Sangma, montri ka kaam pohyung, u Sniawbhalang Dhar, montri ka tnat C&RD, u Marcuise Marak, u Rowell Lyngdoh, Ex MLA ka Mawkyrwat, u Timothy D Shira Dy. Speaker, u Sanbor Shullai, MLA ka South Shillong Constituency, ki Syiem, ki bor pynlai chnong, ki paidbah, kiwa sikai, ki khynnah skur wa kiwi kiwi. Da pynphooh ya kani ka sngi da ki chaad wa ki rwai tynre na ki jaitbru Garo, Khasi, Hajong wa kiwi kiwi.

Kamtæ da ini i thmu u MLA ka Ranikor, uwa ye wow ieh kaam noh nei man dkhot na ka Yung Dorbar chna-aiñ ka Jylla ha kini ki sngi, ka NPP daw ya ryngkat ko i em kiwa mihkhmat ha Yung Dorbar Chna-aiñ ka jylla da mar 20 ngut. Ini i ieh kaam u MLA ka Ranikor, daw pyntikna wa daw em ka Election chiteiñ samoi ha kani ka Constituency.

Advertisement ad1

Ki kaam pyrchah aiñ ha ri-loom Jaiñtia wa kiwi....

Previous

Hadooh 15 kynta pynyinsur ka sorkar ya ki kynt....

Next

0 Comments

Leave a Reply