15 49.0138 8.38624 1 1 4000 1 http://wyrta.com 300 0
Advertisement ad1

Wai u Modi ya ki kaam pynroi wa ha rukom hapoh Assam wa Arunachal

0 Comments

Jowai: U Montri Rangbahdooh ka ri, u Narendra Modi da lai u cha Arunachal Pradesh, Assam wa Tripura heiwa da booh mooyurim u ya ka North East Gas Grid wa kiwi ki kaam (Project) hapoh kini ki jylla.

U Modi hawa e yei klam da ong u wa ynne ka sngi u man ko ka sngi wow sah khana parom ya ki paidbah ka thaaiñ wei i kaam pynroi hapoh ka thaaiñ man ko kawa kongsan tam ya ki paidbah ka thaaiñ deiwa pynrap wa ka Assam em ko ha i luti yong i roi i paar wei da pynsakhiat yeini da ka bhah yong ka mang poisa neibynta ka thaaiñ.

Da ong u leh wa ka sorkar kwah ko wow wanrah yei kaam pynroi liang wanang deiwa pyntikna wa kwah ko wow yada yei man kyrpang ki jaitbru ka thaaiñ.

Hajrong ka Citizenship Amendment Bill, u Modi da kyntu u ya ki paidbah wymhoi u man ki kiwa chah pynbiej ha ki khubor hamsaya wei la 36 snem wa da lai ympu em ye bu pynkrehkaam ya ka Assam Accord pura wei du ka sorkar u Modi wa ye wow pynmankaam yeini.

Da kyntu u leh ya ki party wow dam noh ki wow kyndehke wei sñiaw yong ki paidbah ka Assam du neibynta i myntoi samen yong ki.

Chooh chooh da ong u leh wa deiwa booh mooyurim ya ka North East Gas Grid daw pyntikna ko wa ym em de i thut ha ka rukom saam bordiñ ha ka thaaiñ.

Da wai u leh ya ka Hollong Modular Gas Processing Plant ha Tinsukia ka wow pyndap 15% na ka Gas wa pynmih ha Assam, da wai u leh ya ka LPG Capacity Augmentation of Mounted Storage Vessel ha North Guwahati.

Da booh mooyurim u leh ya ka NRL Bio Refinery ha Numaligarh wa ka 729 km Gas Pipeline na Barauni – Guwahati wow lai lyngba ka Bihar, West Bengal, Sikkim wa Assam.

Chhooh chooh da booh mooyurim u leh ya ka City Gas Distribution Networks ha Kamrup, Cachar, Hailakandi wa Karimganj District deiwa ong wa ha u 2014 em 25 lak ki PNG Connection kiwa da ku cha ka 46 lak du hapoh soo snem wei ki CNG Refuelling Station leh da ku na ki 950 cha 1500 tylli ha kini ki jooh ki snem.

Da booh mooyurim u leh ya ka Six-lane Bridge hajrong ka wah Brahmaputra i wow pynduna yei por wow kaap chiliang ka wah na ka chikynta chiteiñ cha 15 minit donhi.

U Modi da yaroh u leh ya ka Assam kawa da yoh ya ka Bharat Ratna Award da u Gopinath Bordoloi wa u Bhupen Hazarika kawa da e da ka sorkar yong oo. 

Ha Arunachal won da booh u ya u mooyurim ka Greenfield Airport ha Itanagar wa ya ka Sela Tunnel wei da wai u ya ka DD Arun Prabha Channel kiwa chongdor T. 4000 klur neibynta kani ka jylla.

Da wai u leh ya ka IG Park ha wei da lai pait u leh ya ka thaw thain that kawa tip kam ka Loin Loom.

U Modi hei klam yong oo da phah wyrchaw u ya ki 55 snem wa ki 55 bnai wa em ka sorkar u heiwa nachwa ya ka Arunachal da mylliñ ki sorkar warim ka wei ka sorkar yong oo wan ko wow pynkylla ya ini.

Ka Greenfield Airport wa booh mooyurim u Modi toh kawa em ha Hollongi wei da wai u leh ya ka Tezu Airport kawa da chna pynthymme. Ka Airport Terminal kawa em ha Hollongi toh ka wow chna heidor T. 955 Klur ha i thaw wa heh 4100 sq.mt. Heini i por da ong u wa nachwa yow poi cha Itanagar hap hiar ha Guwahati Airport dep te lai da ka kari namo deiwa pynemkaam ya ka Helicopter.

Da ong u leh, “Ka Tezu Airport toh kawa da chna 50 snem nachwa tangwa ym em ka sorkar wa ye u pyrkhat jngai yow pynyabi ya ki bru kani ka jylla wa waroh kawi ka ri. I da pynheh i ya kani ka Airport wa khian deiwa pynlut T. 125 klur”.

Ka Sela Tunnel won toh ka wow yarap wow poi cha Tawang Valley ha waroh chi snem wei u chimpor du chi kynta manda dep chna ya ka heidor T. 700 Klur.

Share this...
Share on Facebook
Facebook
Tweet about this on Twitter
Twitter
Advertisement ad1
Previous
Next

0 Comments

Leave a Reply