Jowai: Soo ngut ki bru wa kynthup ya le ngut ki wakreh ka NEEPCO kawa pynkrehkaam yaka Kupli Hydro Electric Power Project da wiar ki hadien wa ki Pipe wa pynpoi um cha ka Power Station ha Umrangso da piah ki ynne i step heipor kamwa 6:30 iwa da wanrah ya i chlai um haka Power Station kamjooh cha ka chnong wa em cha jan.
Katkam ka khubor naka Newslive TV kiwa wiar da tip kam u Robert Biate, u Prem Pal Balmiki, u Joy Sing Timung (waroh ki wakreh hapoh ka Kupli Hydel Project) wa uwi u wakreh yong kawi ka Company wa pynchna yei sih ki Pipe.
Ki Pipe toh kiwa lai ka um hadooh 12000 litres/sec kawa wan naka Dam ha Kupli wei da em ki thaw wa da siat ka um hadooh da ki spah phut cha suiñ.
Ki bru wa wiar toh kiwa dang kreh heipor wa lait ka um.
I kreh wow chna ya ki Pipe wa lai ka um toh iwa da dep u kreh leh ynnin u snem.
Neiliang ki heh ka NEEPCO da ong ki wa dang yaleh ki katwa ye yow pynduna yei wan ka um.
Discussion about this post