15 49.0138 8.38624 1 1 4000 1 http://wyrta.com 300 0

Wym mano yei dawa, rai ka CoMSO wow pyrchah ya ka sorkar

0 Comments

Shillong: Ka Confederation of Meghalaya Social Organisation (CoMSO) da rai ko wow pynman da ka yalang paidbah wei wow sangeh mih cha sarok kam ka dak wow pynsñiaw yei sñiawsih yei wym mano ka sorkar jylla wow pynpsiah ya ki kyndon ka Inner Line Permit (ILP) deiwa pynkylla ya ka Meghalaya Residents Safety and Security Act (MRSSA), 2016.

U Chairman ka CoMSO, u Robertjune Kharjahrin hadien ka yalang ka dhab ki seiñbhalang da ong u wa ha i yachem wa ki montri ka sorkar wow yaklam kammon wow pynwandur ya ka MRSSA wow ye u pynpsiah ya ki kyndon ka ILP, ka seiñ da yoh ko yei kular da i ktien wa ka sorkar daw wanrah noh ko yei pynkylla ya ka Meghalaya Residents Safety and Security Act, 2016 ha kani ka dorbar wa dang man, tangwa hadooh ynne ka sngi ympu yoo ya ki dak ki chin wow wanrah ya kani ka aiñ.

Da ong u wa lada ka sorkar ym wanrah ko ya kani ka phang ha kini ki ar tylli ki sngi wa dang sah yong ka dorbar ka dhab ym yohsa ko wow chim da kiwi tawon ki luti hajrong ini.

Da ong u wa ka CoMSO da rai ko wow pynman da ka yalang paidbah ha ka 17 tarik uni u bnai wei ha ka 20 tarik won ye u pynman da i sangeh wow mih cha sarok hadooh 10 kynta, itæ nadooh 8:00 i miet ka 20 tarik hadooh 6:00 i step ka sngi wa bood.

Da kyntu leh ya ki paidbah wow e kyrchaan lada ka dhab lai ko chakhmat ya ini i thmu, tangwa lada ka sorkar wanrah noh ko wow pynkylla ya kani ka aiñ daw pynsangeh noh ya ini i pyrchah.

U Kharjahrin da ong chooh chooh u wa lada ka sorkar ym leh ko iyi iyi hajrong ini neiliang ka dhab daw pynjoor ko yei pyrchah sorkar ha ki sngi wow wan.

Advertisement ad1

0 Comments

Leave a Reply