Moosakhia : I thmu yong ki kamwa 40 ngut ki delegate ka Indigenous Terra Madre na ki wa boon ki ri ka pyrthai deilang wa kiwa napoh ri India wow wan cha ka chnong Moosakhia yow maad wei wow sakhi ya ka rukom im, rukom rep, ka riti dustur wa ki baam wa boon jait kani ka chnong man ko kawa thut heiwa kawi na ki artylli ki bos wa chong kini ki bru kylla ko ha chwa u poi Mooryngkhneng. Lait noh na ki le ngut, waroh ki delegate wa em ha katai ka bos wa kylla da pynkit ya ki da ka Ambulance wa kiwi ki kari cha Civil Hospital Shillong yow yoh ki ya i sumar wa emkaam. Kam ka khubor wa yoh ym wa mynsoo joor næ hap sah hopsital.

Ka prokram ha Moosakhia kawa mut u sdang nadooh 10 waje da ye u sdang hadooh 2 waje i sngi heiwa 16 ngut ki delegate da wan ki na phareng wei wa 9 ngut napoh ka ri India ki wa na Tamil Nadu, Assam, Nagaland wei kamjooh leh napoh jylla Meghalaya.

Da pdiang ki nongchong chnong ya kini ki delgate da i tem i put wa i rwai wa i chaad. Da pynyoo leh cha ki ha kani ka sngi ya ka chaad Behdieñkhlam deilang wa i rah ya ki masi loor kam ki rong. Ki delegate leh da chimbynta chongchit lang ki ha kani ka chad Behdeiñkhlam.

Kiwi tawan ki prokram kam i li yahke ya ki delegate cha ki thaw rep yow yoh ki u chimbynta ha i rep kba da pyndam noh ya ka neidaw wa da tbian i por.

Em leh ki pynyoo rong wa kattu katni ya ki symbe jhoor kam u patho, nai lieh, sakhia wa ka chru. Da wan leh ki nong syang dakharang na ka chnong Umlathkur.

Ki delegate wa wan ha kani ka sngi toh kiwa na USA, London, Indonesia, Malaysia, New Caledonia, Fiji Islands, Solomon Islands, wei wa na Vanuatu.

Ha i pyntip kini ki delegate cha ki paidbah da khana ki wa boon na ki kreh ki wa ki seiñ kreh mon sniawbha kiwa yada ya i hok ki wa khian paid kam i khanglad u chah thied chah dai ki thaw ki yow pynemkaam ya ki wow tih ya ki marpoh khyndaw wa boon jait. Em leh ki wa kreh yow pyndooh ya ki baam kam ki chips wa kiwi kiwa ym tei namo pynchait ya ka met ka phad ki bru kamjooh leh kwah ki u pynchlur ya ki bru u baam ki wa yoh na ki lyngkha wa rep ki bru. Da em leh kawi ka nongrep murit kawa wan na Malaysia wei ya ki murit yong ka da pynemkaam da ka seiñ Slow Food ha ki bam wa boon wa chet ki.

Da emleh kattu katni ki wa wan peitke na Jowai ha kani ka sngi wei da ong ki wa sniawsih ki ya i yoo wa ym em man kamwa yooluti ki wei wa ym sniawthooh ki wa heiwon i rukom ini i yalang ynne ka sngi u yarap ki ya ki nongrep kani ka chnong.

Share this:
Share on Facebook0Tweet about this on TwitterGoogle+0
Advertisement ad1