₹133.42 klur yoh nong ka sorkar na ki Concert wa heh wa pynman ha Meghalaya

Ka sorkar Meghalaya da sdang ko sa ka Season 3 ka Meghalaya Grassroots Music Project (MGMP) ynni ka sngi kam chibynta ka World Music Day, wei ha kani ka kynti da pynkylla pyrtuid ka leh cha ka Chief Minister’s Grassroots Music Programme (CMGMP).

U Montri Rangba ka jylla, u Conrad Sangma ha ka yalang wa da pynman ha Lariti Main Auditorium, Shillong da khana u wa heipor wa sdang nyngkong ya ka MGMP da booh ka mang tangka wa ₹3.5 klur wei da yoh myntoi hadooh 2,500 ngut kiwa rwai wa tem ha ka snem wa nyngkong wei kat dang lai i por da ku cha ₹69 klur wei da kyrchaan ya palat 5400 ngut kiwa tem wa rwai heiwa da yoh ki wow lai tem lai rwai la 38000 sien ha kylleiñ ka jylla.

Kamtæ da ong u wa deiwa pynkylla pyrtuid ya ka MGMP cha ka CMGMP ym man de ko du kawa chipor donhi tangwa u man noh ko kawa pura wei kawa daw pynman ka sorkar man-u-snem.

Da pyntip u leh wa daw booh da ki thaw tem wa pura ha kylleiñ ka Meghalaya kam ha ka Ward’s Lake, Shillong wa kiwi de ki thaw wei daw em leh ki thaw wow sikai chaphang ka tem ka put.

Related posts

Yoh kem ki pulit ya uwa e yung wai wei uwa murieh ya ka muna ka Sonam

June 22, 2025

Dat Bomb ka US ya le tylli ki thaw ha Iran

June 22, 2025

Da khana u leh wa ha u snem wa dep, hapoh ka jylla da pynman ya 7 tylli ka Concert wa heh ha ki 13 sngi heiwa ki paidbah wa da wan da em ki 3.86 lak ngut wei ka poisa wa da ye u pynmih dapoi ko ₹133.42 klur neiwa pynlut ₹23.5 klur iwa mut ka nong man ko 5.6 chah. Da ong u leh ki bru wa da yoh khih yoh khan ha kini ki sngi da em ki 5,500 ngut chi sngi wei kiwa uiñke suwari kiwa da wan toh na 20 tylli ki jylla ka India.

Ha kani ka sngi da pynlait leh ya ar tylli ki kot kitæ ka CMGMP Rock and Tourism Festival Booklet wa ka Council Technology Booklet.

Da saam leh ya ka MGMP Award cha kiwa tem wa rwai na Khasi, Jaiñtia wa Garo Hills wa da jop da ki Bending Waves, Magnificent Obsession, Strange Origin, Neil Umwi, Vanessa Suchiang, Snam Rangsa wa kiwi de. Ya ka Special Recognition da e cha u Mayan Khasi, Bachin Yana Momin wa Chevinia kam kiwa dang khian rta dooh neitæ da e leh cha ka Tekisha Shabong wa Khongsam hapoh ka “The Sound of Music” kawa man neibynta kiwa duna hei bor i doh i pran, u Dan & Zac wa u Ricky Dawa da man ki kam ki Fan Favourites, u Eno Kharkongor kam u Best Gospel Artist.

Waroh ka poisa kawa da saam dapoi ko ₹10,00,000 heiwa da em kiwa yoh ₹35,000 hadooh ₹45,000.