10 ngut kiwa da yap nei oor khyndaw wa wanrah u slap wa joor ha West wa South Garo Hills

U slap wa joor nadooh ka 4 tarik da ktah joor bha u ya ka West wa South Garo Hills heiwa i chlai um wa heh toh ha ka thaaiñ Dalu ka West Garo Hills wa ha ki Plain Belt, Gasuapara ka South Garo Hills heiwa da em leh ki yingkieñ kiwa da chah rah wei kiwa yap waroh dapoi ki 10 ngut. 

Ha Dalu da em 3 ngut kiwa yap nei oor khyndaw ha ka 4 tarik wa kynthup ya u khynnah wa dang 5 snem uwa tip kam u Miardo P. Marak, ka Santa N Marak (57 snem) wa ka Sarika M. Marak (18 snem).

Ha ka 4 tarik hi, ha Atisia Songmong ka South Garo Hills da em 7 ngut kiwa yap nei oor khyndaw kiwa man kam kiwa chi yung chi sem.

Kini kiwa yap toh ka Silji R Marak (60 snem) kawa man kam ka bei, ka Merina R Marak (39 snem) kawa man kam ka khon, u Sama N. Sangma (50 snem) uwa man kam u pyrsa kurim, ka Chengbe R Marak (22 snem) kawa man kam ka ksu, u Desrang R Marak (14) uwa man kam u ksu, ka Silbera R Marak (8 snem) kawa man kam ka ksu, ka Dimse R Marak (1.5 snem) kawa man ka khon ka Chembe.

Related posts

Pyrchah ki 3 chnong wa ki seiñbhalang yei thmu wow pynkylla ya ka CTI cha ka thaw booh karkhana

November 22, 2024

Da pynsangeh sa ka PET kiwa yaleh kreh pulit wa pynman ha Sahbsein

November 22, 2024

Neiliang u Montri Rangbah, u Conrad K Sangma da phah u wow pynlait ya ka poisa yarap cha kiwa ha-yung kiwa khlaad.

Kiwa mynsoo da em ki soo ngut ha West Garo Hills nei oor khyndaw kiwa da pynkit cha thaw sumaar.

Neiliang ki bru ka NDRF dang pteiñ ki wow thooh ha kini ki thaw wa oor khyndaw.

U sarok wa lai na Dalu cha Baghmara toh uwa da chah ktah nei oor khyndaw ha kiwa boon ki thaw heiwa neiliang u Conrad da phah u ya ki bor District wow thooh da kiwi ki luti yow lai cha Dalu wa cha Baghmara.

U Conrad da phah u leh wa ya kitu ki yingkieñ dieñ kiwa da chah rah chah rong ha ka um wow pynchna ki wei da e buit u wow chna da ki jait yingkieñ wa tip kam ki Bailey Bridge kiwa man ki jait yingkieñ kiwa dadep chna chwa wei su u pyndait donhi.

Chooh chooh da pyntip u wa waroh ki yingkieñ dieñ wa em hapoh ka jylla u kylliang noh ki da kiwa thymme. 

Neiliang ki bru ka MeECL da pyntip ki wa daw pynpoi bordiñ biang myntu ka sngi cha kini kiwa boon ki thaw kiwa chah ktah.

Deiwa kheiñlang ha West, South West wa South Garo Hills, ki chnong wa chah ktah da em ki 54 tylli, ki yung wa da chah pynsih da em ki 58 tylli, kawi ka PHC, kawi ka Sub-Centre, kawi ka skur wa 18 tylli ki sarok. Waroh ki bru wa chah ktah da em ki 4954 ngut.

Da em leh 10 tylli ki mrad wa ri wa yap.