Ynne ka sngi hawa yaklam wa u Deputy Commissioner ka West Jaiñtia Hills, u Garod LSN Dykes da ong u wa hapoh District em 106 ngut kiwa dang chah ktah ha u COVID-19.
Da ong u wa na kini ki 106 ngut, da em 10 ngut kiwa em ha MCH, Jowai wei kiwi tawon da chong kset ki ha yung (Home Isolation).
Heiyatoh wa kiwa wan chim dawai yada namo i tika COVID-19 da ong u wa ynnin da yoo wa da boon kiwa wan chim ya ini i dawai khamtam hadien wa da pynman ya ka Mobilisation Meeting namo ka yalang wa ki Synjuk Waheh Chnong wa ki khlieh ki seiñ niam kawa da pynman ha ka 23 tarik uni u bnai.
Da ong u wa ha ka 24 tarik da em 198 ngut kiwa wan chim ya sien nyngkong (First Dose) wei 27 ngut kiwa wan chim ya i sien wa ar (Second Dose) katwa ynnin ka 26 tarik da em 1,200 ngut kiwa chim yei sien nyngkong wa 93 ngut kiwa chim ya i sien wa ar.
Heijooh i por da yooluti u wa ha ki sngi wow wan daw rap boon ki wow wan chim dawai neibhah wa da sñiawthooh ki bru yei myntoi wow yada pyn ya idæ wa ya ka yung ka sem.
