Ka Meghalaya Assembly Committee on Estimates, wa yahkhmat da u Chairman uwa man leh u MLA ka Nongpoh, u Mayralborn Syiem ha ki 3 sngi nadooh ka 19 tarik uni u bnai da lai pait ki ya ki kreh wa dang sahteiñ khlem pyndep wei da em leh kiwa da ieh khlem kreh ha ki 5 tylli ki District ka jylla.
Kini ki kreh wa dang sahetiñ toh kiwa da pynkreh da ka Health Department waka Education Department ha kini ki District wei heini i lai pait lai sylli da emlang leh kiwi ki dkhot ka Committee nadooh u MLA ka Mawkyrwat, u Renikton Lyngdoh Tongkhar; u MLA ka Raksamgre, u Limison D. Sangma; ka MLA ka Ampati, ka Miani D Shira; U MLA ka Jowai, u Wailadmiki Shylla; u MLA ka Mawhati, u Charles Marngar; u MLA ka Selsella, u Arbinstone B. Marak; u MLA ka Rambrai Jyrngam, u Remington Gabil Momin wa u MLA ka Umroi, u Damanbait Lamare.
Nadooh ka 19 tarik da lai cha Eastern West Khasi Hills District, West Khasi Hills District, East Garo Hills District, West Garo Hills District wa Ri-Bhoi District.
Ki kreh wa da lai pait toh ka Residential School ha Lawbyrtun, Mawthadraishan, Eastern West Khasi Hills District, ka Polytechnic Institute ha Nongstoin, West Khasi Hills District, ka Nongchram Demik Residential School ha Rongjeng, East Garo Hills, ka Eklavya Model Residential School Samanda, hapoh ka Nengkra, Samanda Block, East Garo Hills kiwa da lai pait ha ka 19 tarik.
Ha ka 20 tarik da lai cha West Garo Hills District heiwa da lai pait ya ka Trauma Centre ha Tura Civil Hospital waka Edenbari ABDK Residential School ha Rongram.
Ha ka 21 tarik won da lai cha Ri-Bhoi District heiwa da lai pait ya ka Eklavya Model Residential School Project ha Pahamsyiem, Umling CRD Block, ka Polytechnic ha Nongkhrah, Nonglyngdoh, ka Trauma Centre ha Nongpoh Civil Hospital, Nongpoh waka Maternal and Child Health Hospital ha Umsning.
Ha ini i lai yachem da yaklam bniah bha wa ki bor District wa ki heh ka Health Department, Education Department, PWD (Building) wa kiwi de ki chnat wa embynta ha ini.
Hawa yaklam wa kiwa thoh khubor ha ka sngi wa khaddooh ha Umsning, neiliang u Mayralborn Syiem da ban joor u yeiwa emkaam u leh yeiwa toh u leh yow pyndep smat ya kini ki kreh.
Da khana u leh wa ki daw wa sahkut ki kreh toh kiwa boon, nadooh i wym dap poisa, i wym biang i chna ya ki Project Estimate deiwa pynrap wa ka Committee daw booddien ko yow pyntikna wa kini ki kreh u pyndep hei por yow yoh myntoi ki paidbah.
Discussion about this post