Jowai: Ka seiñ ki warep yong ka jylla ka Hill Farmers Union (HFU) hapoh i yahkhmat yong u Commander Shangpliang kam u President yong ka Central Body da dang khlan ko na i por cha i por wei katni da sdang poor sdang heh ko cha ri-loom Garo.
Ka HFU ha ka 22 tarik uni u bnai da pynman ko yaka yalang ha Tura heiwa da jied ya kiwa kitkaam yong ka Hill Farmers Union (HFU) West Garo Hills District. Kiwa kitkaam yong kani ka District toh ka Silme D Marak kam ka President, u Grikseng D Marak Vice President, u Lelynggread K Sangma kam u General Secretary, u Senclerk G Momin Assistant Secretary, u Badith T Sangma kam u Finance Secretary wa u Shoshon kam u Publicity Secretary wei da jied leh ya ki Executive Member.
Ya kini kiwa kitkaam da pynskem da u Commander Shangpliang, President ka seiñbei hei emlang u General Secretary u Alfondbirth Kharsyntiew. U Commander Shangpliang da pyntip u wa ka seiñ deiwa ya krehlang waka chnat ka rep ka riang yong ka sorkar jylla daw pynman ko ya ka 2nd Meghalaya Farmers Parliament ha Tura ha ka 10 wa 11 tarik u Kmaichonglad (December) uni u snem wa i pynkhreh da lai ko chakhmat.
Da pyntip u wa ka seiñ katni de ye ko wow pynpsiah dkot kamba 47,000 ngut ha Khasi Hills wei lyngba i pynpsiah dkhot sa ha Garo Hills ka seiñ da poi i em dkhot ko cha ka 50 hajar ngut tam. Da kyntu u ya ki warep ha kylleiñ ki chnong wow jied noh ki ya kiwa kitkaam yong ka HFU wow yaklam yei eh i khoo ki warep yachem ki ha ki chnong ki thaw, ka thaaiñ, Block, ka District wa ka jylla hi waroh kawi.
U Commander Shangpliang da pyntip u wa ha ka 04-12-19, ka seiñ daw pynman ko yaka yalang kawa kyrpang ha Mawkhar Dorbar Hall ha i por 10:30 i step wei da khut ya waroh ki warep ka jylla wow chimbynta neidaw ka seiñ em ko i thmu wow pynbna wa emkaam wow man neibynta i myntoi ki warep ka jylla waroh kawi wei da kyntu ya ki warep wow phone ha u number 8837287374 lada ym pu che lane kwah yutip hajrong ka seiñ HFU khnang wow jied noh ya kiwa kitkaam ha man ki chnong ha ka jylla.
Discussion about this post