Ka sorkar Meghalaya u e i kyrchaan wa 100% cha ki warep ka jylla neibynta waroh ki mar rep neibynta u snem 2023-24 hapoh ka Crop Insurance Scheme “Pradhan Mantri Fasal Bima Yojana (PMFBY)”.
Kani ka Scheme toh yei thaw rep wa heh hadooh 1 Acre uwi u warep yow yarap lada jia iwon iwon ya ki mar rep kam heiwa ym yoh u ah lane u heh u san wei ka sorkar da booh ko T. 4.4 klur hapoh kani ka Scheme heiwa ya ka bai Insurance daw su ka sorkar 100%.
Ya ka Pradhan Mantri Fasal Bima Yojana (PMFBY) da pynkrehkaam hapoh ka jylla Meghalaya nadooh u snem 2016 yow yarap ya ki warep lada jia wa ktah ki bor rym-aw ya ki mar rep wei heitu i por ki warep hap ki wow su 2% neibynta ki mar rep wa da rep heipor lyiur (Kharif Crop) wa 1.5% neibynta ki mar rep wa rep heipor tlang (Rabi Crop) wa 5% won ya ki soh ki pe hapoh kani ka Scheme. Kawa sah won ka bai Insurance da su 50:50 hapyrdi ka sorkar jylla waka sorkar pyrdi.
Ya kani won da kylla cha 90:10 neibynta ki mar rep Kharif nadooh u 2020 deiwa pynkylla ya ka PMFBY. Kani ka Scheme toh neibynta waroh ki warep nadooh kiwa rep deiwa chim wai yei thaw rep lane kiwa rep lang ha i jooh i thaw.
Kamtæ yow pynchlur ya ki warep wow chim ya kani ka Scheme, neiliang ka chnat Agriculture and Farmers’ Welfare ka sorkar jylla deiwa ya krehlang wa chnat wa pynkrehkaam ya kani ka Scheme ka Agriculture lnsurance Company da pynkit ha ki wow pynman yei pynsñiawthooh paidbah neipor cheipor.
Hajrong ini, ka sorkar jylla da booh ko wow kyrchaan T. 4.4 klur wei da booh thong wow thap pyrtuid ya 27,000 ngut ki warep ya ki mar heipor lyiur yong u snem 2023 wa 10,000 ngut ki warep wa rep ya ki mar heipor tlang neibynta u snem 2023-24.
Kamtæ deiwa e yarap 100% kani ka Insurance da yooluti wa da em boon ki warep wow wan chakhmat wow chim kabu ya kani ka Scheme kawa jooh duna bha kiwa da wan wow thap pyrtuid nachwa wei daw yarap ko wow pynduna yeiwa hap kit ki warep lada jia iyi iyi ya ki mar rep yong ki.
