Ynne i miet u Director General Military Operations ka Indian Army, u Lt. Gen. Rajiv Ghai da ong u wa da em kamwa 100 ngut ki Terrorist wa hadooh 35-40 ngut ki chipai ka Pakistan wa yap nadooh wa sdang ka Operation Sindoor ha i step synyaaw ka 7 tarik uni u bnai.
Da ong u wa ka thong hi mar sdang ka Operation toh wow dat pyndooh ya ki thaw rieh ki Terrorist hadien wa chah siat yap ki 26 ngut ha Pahalgam ha ka 22 tarik u Naitung uni u snem wei ha i step synyaaw ka 7 tarik da mang ya ki thaw wa rieh ki Terrorist donhi kiwa em ha chiliang u pood ka ri ha Pakistan (ha POK wa Pakistan) heiwa da em kamwa 100 ngut ki Terrorist wa da yap.
Da ong u wa da klam che nawa sdang wa da mang du ya ki thaw Terrorist tangwa da pynheh noh ka Pakistan ya ini i thmu heiwa ki chipai katai ka ri da sdang siat ki cha India cha liang u Line of Control.
Chooh chooh da khana u wa da em 35-40 ngut ki chipai ka Pakistan wa da yap nadooh wa sdang ya kani ka Operation deiwa pynrap wa ymtoh i kaamram ki chipai ka India wow ñiaw ya ki metyap katai ka ri neibhah emkaam wow kynjoh ya ka thong donhi.
U Lt. Gen. Ghai da ong u leh wa u ynnin ka sngi u DGMO ka Pakistan da yaklam u wa oo lyngba ka Hotline wow kyrpaad u sangeh yei yasiat yeiwa da pdiang ka India, tangwa du hadien kamwa 2 kynta ka Pakistan da tyngkheiñ ko yeini wei neiliang ka India leh da jubab ko deiwa khor.
Da ong u leh wa lada myntu i miet lada tyngkheiñ ka Pakistan yeiwa da rai ynnin neiliang ki chipai ka India leh ym yohsa ki wow pynjoor ya i kaam palat yeiwa leh ka Pakistan.
Discussion about this post