Ka sorkar jylla da mynjur ko ya ka Meghalaya Health Academic Rules 2024 wow pyntikna yei pynkrehkaam ya ki Medical College ha i por wa da booh.
Hawa klam cha ki laad pathai khubor hadien wa wai ya yalang ki Montri sorkar, ka Montri ka chnat i chait i khiah, ka Ampareen Lyngdoh da ong ko wa da wanrah ya kani ka Service Rule yow thung ya kiwa sikai ha ka Shillong Medical College wei ka sorkar da booh thong ko wow sdang yei lai puræ Doctor ha u snem 2025-26 wei ka mang poisa neibynta ini ym duna ko ya Rs. 60 klur ha ka chi snem.
Ka Ampareen da ong ko wa ka sorkar da em chwa ko ki Doctor ki wow man kam kiwa sikai kiwa na ki Hospital ka sorkar wow sikai ha kani ka Shillong Medical College najrong kiwi de.
Lyngba ini i rai ka yalang ki Montri, ka sorkar daw lai ko chakhmat wow pynkrehkaam smat katwa ye yaka Shillong Medical College.
Kam wow kdaw heini wa ka sorkar da pynkhreh ko ya ka Shillong Civil Hospital wa ka Ganesh Das Hospital kam ki thaw puræ Doctor yong ka Shillong Medical College.
Da ong ko wa ka sorkar da pynbha ko ya ki tiar ki taar wa kiwi de wa emkaam ha u snem sdang wei daw pdiang 100 ngut ki wow lai puræ Doctor.
Hawa yatoh wa ka Tura Medical College, da pyntip ko wa ka sorkar dang pynkhreh ko wow sdang kamwa leh ya ka Shillong Medical College hanla rap chimpor i.
Ka sorkar da mynjur ko leh ya ka Meghalaya Dental Health Service Rule 2024 ka wym pu em hadooh katni wei kani man ko neibynta wow thung kreh, wow pynsmat ya ki kaam pynku kyrdan wa kiwi kiwa yatoh wa i sumaar lamieñ.
Discussion about this post