Ka DC ka East Khasi Hills kawa man leh ka District Election Officer da pynmih kyndon ko heiyatoh wa ka Election chiteiñ samoi cha ki ar tylli ki Constituency wa em hapoh ka District kitæ ka Mawryngkneng wa ka Mawphlang deiwa pyntip leh wa ka Model Code of Conduct toh kawa da krehkaam ha waroh kawi ka District nadooh ka 28-09-21.
Heiyatoh wa i thap pyrtuid ki kyrtong, hachwa wow lai thap pyrtuid wei hadien wa thap pyrtuid, ym chah wow pynman ya kawon ka yalang paidbah lane ka lai paidbah. U chah wow wan du 3 tylli ki kari hapoh 100 Meter na ka yungkrehkaam u RO wei ym chah wow lai paidbah hawa lai thap pyrtuid.
Waroh ki yalang emkaam wow yoh bor chwa wei daw e bor deiwa chong hei long i man i thaw.
Lada pynman hapoh yung, u chah wow em bru 30% donhi dei wym toh u tam 100 ngut ki bru. Hap wow booh leh ya ka Register yow chim yei pyrtuid ki bru wa wan.
Lada pynman yalang cha lait iwa chong leh hei heh i thaw, u chah du 30% ki bru lane 500 ngut ha waroh ki thaw. Ya kini ki thaw toh u kær kut iwa toh u pynlut da u kyrtong/Party wei toh u sonteri da ki pulit.
Lada em wa wan da kiwa pawnaam wow yalap Election toh u jied chwa 20 ngut donhi ya ki National/State Party katwa ya ki Party wym pu tipmit daw chah du 10 ngut.
Ym chah wow pynman ya ki Road Show kam ki Motor/Bike/Cycle Rally.
Lada pynman yalang cha rood sarok, u chah wow em 50 ngut donhi ki bru iwa chong leh hei yoh thaw wow pynman. Kamjooh hawa lai da ka kari wow yalap Election.
Hawa lai yalap Election na iwi i yung cha iwi, u chah wow yah bru 5 ngut donhi wa kynthup ya u kyrtong.
Ki kari wa chah u pynemkaam u kyrtong toh 20 tylli dei wym kheiñ ya ka kari uwa yalap Election wa pawnaam namo u Star Campaigner. Ki bru wow em hapoh kari toh u em ki 50% donhi.
Ym chah wow yalap Election 72 kynta chwa wow thaw Vote.
Ha ka sngi thap Vote u chah 2 tylli ki kari wa em 3 ngut ha kawi.
Hap leh wow bood ya waroh ki kyndon yada na u COVID-19 wei lada em kiwa tyngkheiñ kyndon, ym e bor de wow pynman ya kiwon kiwon ki yalang kamjooh ya u Star Campaigner.
U kyrtong, ki Election Agent, ki Polling Agent, kiwa yah kari wa kiwi kiwi kiwa hap wow yachem paidbah toh u man ki kiwa da dep yoh tika waroh arsien.
Ym chah leh wow biah Poster, wow thoh cha ki chram wa kiwi kiwi ki jait kam kini wa kynthup yei wah Banner ha ki luti ki syngkieñ.
Ym chah leh wow pynemkaam tanghæng nadooh 10:00 waje i miet hadooh 6:00 waje i step.
