Jowai: Kam chibynta i lehwarom yaka World Environment Day næ ka sngi pynneh pynsah rymaw kawa da kynmoo warom ha waroh ka pyrthai khlieh ka 5 tarik u Naiynru, kamtæ neiliang ka Party NPP dei ya krehlang waka State National People Youth Front, ka National People Youth Front, West Jaiñtia Hills District, ynne ka sngi da chim ki wow kynmoo warom ya kani ka sngi deiwa pynman i thung dieñ haki bynta ka Syntu Ksiar, Jowai hadooh kamwa 100 tre ki dieñ wa da yoh naka chnat Forest.
Heini i thung dieñ da chimbynta nadooh u MLA ka 2-Jowai Constituency u Wailadmiki Shylla, ki MDC ka JHADC wa kynthup ya u Brightstar Chyrmang, u Lakhon Dkhar wa u Otomewot Lamin uwa man leh kam u District President ka NPP.
Kiwi won wa emlang kynthup ya u Vice President State National People Youth Front u Fazal War Nongbri, u State Youth General Secretary In-charge West Jaiñtia Hills, u Martinet Shullai, u General Secretary NPP West Jaiñtia Hills u Donboklang Kharjana, u President Jowai Block u Darilang Lamare nalor kiwi won ki dkhot ka Party NPP.
Chwa u thung deiñ neiliang u Wailadmiki Shylla da kyntu u wa hawa thung dieñ iwa emkaam dooh toh i sumaar wei u chim yukheiñ wa katwon tylli da ye i wow sumaar na kiwa da thung i, neibhah lada kheiñ, man u snem daki lak ki phaw hajar da thung tangwa du katwon da wiar wei yap ki.
Hawa kyruiñ won u cha ka World Environment Day, ong u wa nadooh i por wym pu em u booh yaka sngi kyrpang u leh warom yei emkaam u pynneh pynsah yaka rymaw leh, da yoo wa ha kini ki thaaiñ ki thaw yong i da man chwa kiwa yoh sikai hajrong wa kammon u yada yaki khloo ki kjam næ ka bei rymaw, neibhah da em chwa i yaki khloo kyntang kiwa u warim da sikai u wow sumaar wei wot hadooh kini ki sngi leh dang pteiñ i wow pynneh pynsah.
Tangwa hajrong ini leh ong u wa dang emkaam chooh chooh u leh neibynta u pynneh pynsah yaka rymaw, neibhah wa yoo i yei chah ktah kat nang mih ki sngi, deiwa e nongmuna haroh u hajrong i chah pynsih pynpra wada jia ha kini ki sngi wa dep nei joor slap hadooh wa da oor ki loom ki wah hapoh ka District.
