Ka FKJGP Lama Unit ha ka 22 tarik uni u bnai da e sñiawbha ko da 100 tylli ki chuki wa kawi ka Mortuary Trolley cha ka chnong Lama ha ka yalang wa pynman ha Community Hall ka chnong kawa pynlai da u Lamchwa Dong uwa man u President ka FKJGP Lama Unit.
Neiliang ka chnong lyngba u Mission Syrti da e khublei u ya ka seiñ wa wot hei rta wa dang khian da ye ko u e chakri deiwa e yarap kamni cha ka chnong katwa neiliang ka Balang da yoh i klam na u Secretary ka Balang Presbyterian Lama, u Arjen Rupsi uwa da e khublei ya ka seiñ wa da ye ko u e yarap da kani ka kari kit synduk bru wei da e mynsien u leh ya ka seiñ yow nang ye ko u lehbha chooh chooh hapoh ka imlang sahlang.
Da yoh leh yei klam na u Ampli Rupsi uwa man leh u Secretary ka FKJGP Bataw Unit uwa da yaroh ya ka seiñ wa ye ko u leh chiboon ki kaam wa bha.
Neiliang u kongsan, u Deihok Sumer uwa man leh u President ka FKJGP East Jaiñtia Hills District da ong u wa ka kaam chakri paidbah man ko kawi na ki kaam chakri ya u Blai. Da ong u leh ka Temple wa kordor tam ha pyrthai toh u dohnood lada em i ha iwon iwon i kaam wei lada ym khooid mynsien ym myntoi iyi iyi leh. Deiwa pynrap wa boon kiwa yahkhmat mih ki na ki yung wa dooh wa duk.
Da yoh ya ki kyntien khublei na u Evanmiki Suchen uwa man leh u Secretary FKJGP Lama Unit. Hadien neitæ u President ka FKJGP East Jaiñtia Hills District da e kti u ya ki chuki cha ka dorbar chnong wei u President ka FKJGP SEBA Circle, u Mathew Pajat da e kti u ya ka Mortuary Trolley cha ka Balang.
Da ya emlang leh ha kani ka yalang wa u Andiwor Pala uwa man u Organising Secretary ka FKJGP East Jaiñtia Hills District wa u Omega Sumer uwa man u Organising Secretary SEBA Circle.
Discussion about this post