U montri rangbah ka jylla, u Conrad Sangma da ong u wa ka sorkar da ye ko wow pynboon ar chah ya i em ki tadong Oxygen ha ka jylla heiwa heipor wa wan ka khlam ha ka sien wa nyngkong da em 700 tylli ki tadong Oxygen wei katni won da em ki 1500 tylli.
Da ong u wa ha ki ar tayaw wow wan daw em 1000 tylli ki pyllong wa em Oxygen neibynta kiwa yoh COVID-19 deiwa pynrap leh wa ha ki sngi wow wan ka Tura, Jowai wa Nongpoh daw em ki ya ki Oxygen Plant wei ha ki tayaw wow wan wan sa ha Nongstoin, Williamnagar, Baghmara wa Ampati.
Chooh chooh da ong u wa neidaw wa yoo wa daw ku kiwa chah ktah ha ka khlam, ka sorkar da rai ko wow booh ya ki thaw sumaar wow pait da ki chnong ha kylleiñ ka Shillong neibynta kiwa ym emkaam wow lai cha Hospital.
U Conrad da ong u wa hadien wa yoo wa ku kiwa chah ktah khamtam hapyrdi u Naisan, heiwa da antaad wa daw em 5000 ngut kiwa chah ktah, ka sorkar da rai ko wow pynkrehkaam da ka Lockdown khamtam ha Shillong wei lada ym leh chwa kamni daw sih bha i man i long waroh.
Heijooh i por da ong u wa hanlada em ki kyndon wa khoom wa kdoh dang boon kiwa chah ktah wei lada pteiñ kamni daw em hadooh 7000 – 8000 ngut ki wow chah ktah chwa wow kut u bnai.
Da ong u wa ynnin heipor wa yaklam wa u montri ka sorkar pyrdi wa pait ya i chait i khiah, u Dr. Harsh Vardhan da kyntu u wow pynjoor yei e tika neibynta ki jylla wa khian kam kiwa ha ka thaaiñ Northeast.
Da kyntu u leh ya ki paidbah khamtam ki seiñ saiñhima wymtoh u kdaw-kti iwi ya iwi tangwa emkaam wow e ya ki yutip wa bniah deiwa pynrap leh wa ki paidbah ymtoh u chah yah bakla ki ha ki khubor hamsaya wa da pynpoor lyngba ki Social Media.
