Ka seiñ HYC Jaiñtia Hills District hadien wa da yoh ko yei ujor na ki paidbah wym jooh wan biang por kiwa kreh, kamtæ ynne ka sngi hapoh i yahkhmat u Phaitki Suna, Organising Secretary wa u Yoodahunki Shylla, Vice President da chem ki dei khmat wa kiwa kreh sorkar wa em hapoh ka PWD (R) South Jowai Division toh ki wym wan kreh deiwa biang por.
Heini i lai ka seiñ da chem ko wa kat hadooh 11:00 waje leh ym em bru wa wan kreh lait noh du ar ngut kiwa em ha ki kamra krehkaam yong ki wei kamjooh da chem leh wa u Executive Engineer ka South Jowai Division uwa man khlieh kani ka yung krehkaam, oo leh ym em u heini i por.
Neiliang ka seiñ da pynsñiaw ko yei sñiawsih wei da beiñ ko leh yeini i wym burom yei por wa kordor ki paidbah kiwa da chem chitom neidaw wym em ki bru wa kreh iwa da ktah khamtam ya kitu kiwa wan na jngai kiwa da hap wow yabeh por khnang wow yoh pyndep rap biang por wei da em kiwa hap wow liwan thylli neidaw wa hap beh ya ki kari kamai yow ye biang u liwan cha chnong.
Kamtæ ka seiñ da kylli ko wa hawa waroh ki bru ye ki u yabeh yei kaam yong ki ileh won ym burom yei por? Da ong leh kammon kamni wym tip u burom yei kaamram wa da e ka sorkar wow chakri ya ki paidbah kiwa emkaam jhan wow pyndep yei kaam yong ki wei kam kiwa kreh sorkar toh u em i kitkhlieh wow pyndep yei kaam.
Ka seiñ da kyntu ko leh ya kiwi ki chnat sorkar wow wan kreh biang por ki wei wow chakri ya ki paidbah deiwa wan biang por yow myntoilang da waroh.
Discussion about this post