Ynne ka sngi kawi na ki karkhana pynmih khyndaw bilat kawa em ha East Jaiñtia Hills, ka Dalmia Cement Bharat Ltd. dei sñiawkhia ya i chait i khiah ki bru wa chong chnong da pynman ko i e dawai mynkna namo ka Free Health Check-up deilang waka Consultation Camp wa kyrpang neibynta ki manyung wa duna hei yoh i laa.
Kani ka e dawai mynkna da pynman ha chnong Thangskai hei yakrehlang ka chnat i chait i khiah ka East Jaiñtia Hills.
Hawa yaklam wa u Dr. Ramanand Prasad uwa man u In-Charge yong ka Occupational Health Centre ha kani ka karkhana da ong u wa kani ka thaw man ko kawa cha jngai wei ki bru ym rap yoh ware ki yei sumaar wa paka kamtæ kiwa pynlai ka karkhana da rai ki wow pynman da i e dawai mynkna wei ynne man ko kawa sdang wei daw pynman kam kani cha kiwi ki thaw leh.
Da khana u wa i daw wa pynman ya kani ka Camp toh wow chem ya ki bru kiwa em i kjut wa da neh slem (Chronic) wei daw ye won wow booddien ya ki hadien.
Chooh chooh da pyntip u wa da pynlang u ya ki yukheiñ heiyatoh wa ki chitom ki bru na ka thaaiñ heiwa ha ki le bnai wa dadep da chem ya ki kjut wa yatoh wa ka sniehdoh, ki kjut wa yatoh wa i suk riñ mynsien, Gastritis wa kiwi kiwi.
Chooh chooh da pyntip u wa daw pynman ya ki e sikai heiwa kammon wow man ki bru kiwa lehkhooid.
Ha kani ka sngi da em hadooh 111 ngut kiwa chong chnong kiwa da yoh myntoi na kani ka Camp wei neiliang yong ki leh da e khublei ki ya kani ka karkhana wa da wan ko chaphrang wow e dawai wei wow sylli ya i chait i khiah yong ki.
